Namba

8 Jehova i tokim Moses olsem: 2 “Yu mas tokim Aron olsem, ‘Taim yu laitim 7-pela lam, putim ol gut na bai lait bilong ol i sut i go long fran bilong lamsten.’”+ 3 Orait Aron i mekim olsem. Em i laitim ol lam bilong lamsten na lait bilong ol i sut i go long fran bilong lamsten.+ Em i mekim olsem Jehova i bin tokim Moses. 4 Ol i wokim lamsten olsem: Ol i kisim gol na paitim long hama bilong wokim; kirap long ol bun bilong en i go inap long ol plaua bilong en,+ ol i paitim long hama bilong wokim. Ol i wokim dispela lamsten wankain olsem visen+ Jehova i bin soim Moses.

5 Jehova i tok moa long Moses olsem: 6 “Yu mas singautim ol Livai i kam na mekim ol i kamap klin.+ 7 Yu mas bihainim dispela pasin taim yu mekim ol i kamap klin. Kisim sampela wara bilong mekim ol i kamap klin* na tromoi liklik liklik antap long ol. Na ol i mas kisim resa na sevim olgeta gras long bodi bilong ol, na wasim klos bilong ol, na ol i mas mekim ol yet i kamap klin.+ 8 Na bihain ol i mas kisim wanpela yangpela bulmakau man+ na kisim tu gutpela plaua em ol i tanim wantaim oil bilong givim olsem ofa bilong wit samting.+ Na yu mas kisim narapela yangpela bulmakau man bilong mekim ofa bilong tekewe sin.+ 9 Na yu mas bringim ol Livai i kam sanap long fran bilong haus sel bilong bung na yu mas singautim olgeta manmeri bilong Israel i kam bung.+ 10 Taim yu bringim ol Livai i kam sanap long ai bilong Jehova, ol Israel i mas putim han bilong ol antap long het bilong ol Livai.+ 11 Na Aron i mas tokim ol Livai long muv i go i kam long ai bilong Jehova olsem ofa bilong mekim i go i kam+ em ol Israel i givim. Na ol Livai bai mekim wok bilong Jehova.+

12 “Na ol Livai i mas putim han bilong ol antap long het bilong dispela 2-pela bulmakau man.+ Bihain long dispela, ol i mas ofaim wanpela olsem ofa bilong tekewe sin na narapela olsem ofa bilong paia i kukim olgeta i go long Jehova. Ol i mas mekim olsem bilong karamapim sin+ bilong ol Livai. 13 Yu mas tokim ol Livai long sanap long ai bilong Aron na ol pikinini man bilong em, na yu mas tokim ol long muv i go i kam long ai bilong Jehova olsem ofa bilong mekim i go i kam. 14 Yu mas makim ol Livai long stap narakain long ol Israel, na ol Livai bai i stap lain bilong mi.+ 15 Yu mas bihainim dispela pasin taim yu mekim ol i kamap klin na yu mas tokim ol long muv i go i kam long ai bilong God olsem ofa bilong mekim i go i kam. Na bihain ol Livai i ken kam mekim wok long haus sel bilong bung. 16 Em lain yupela i bin givim, yupela i bin kisim ol namel long lain Israel na givim long mi. Ol i kisim ples bilong olgeta fesbon pikinini* bilong ol Israel.+ Ol Livai i bilong mi. 17 Olgeta namba 1 pikinini bilong yupela ol Israel na bilong ol animal tu i bilong mi.+ Mi makim ol pinis olsem ol i bilong mi yet taim mi bin kilim i dai ol namba 1 pikinini bilong ol Isip.+ 18 Mi kisim ol Livai bilong senisim olgeta fesbon pikinini bilong ol Israel. 19 Mi makim ol Livai namel long lain Israel na givim long Aron na ol pikinini man bilong em. Na bai ol i kisim ples bilong ol Israel na mekim wok long haus sel bilong bung+ na helpim wok bilong karamapim sin bilong ol Israel. Nogut ol manmeri bilong Israel i go klostu long ples holi na bagarap i painim ol.”+

20 Orait Moses wantaim Aron na olgeta manmeri bilong Israel i mekim olsem long ol Livai. Ol Israel i bihainim tok Jehova i bin givim long Moses na ol i mekim ol dispela samting long ol Livai. 21 Ol Livai i mekim ol yet i kamap klin na wasim ol klos bilong ol.+ Na bihain Aron i tokim ol long muv i go i kam long ai bilong Jehova olsem ofa bilong mekim i go i kam.+ Na Aron i mekim ol sakrifais bilong karamapim sin bilong ol na bai ol i kamap klin.+ 22 Na bihain ol Livai i go long haus sel bilong bung na mekim ol wok aninit long Aron na ol pikinini man bilong em. Ol manmeri i mekim ol samting long ol Livai olsem Jehova i bin tokim Moses.

23 Jehova i tokim Moses olsem: 24 “Ol Livai i mas mekim olsem. Taim wanpela man i gat 25 krismas na i go antap, orait em bai kirap mekim wok insait long haus sel bilong bung. 25 Em i ken mekim wok i go inap long em i gat 50 krismas, na em i ken ritaia long wok. 26 Em i ken helpim ol lain bilong em husat i mekim wok long haus sel bilong bung, tasol em yet i no ken wok long hap. Yu mas tokim ol Livai long mekim olsem na bai ol i ken mekim ol wok bilong ol.”+