Jop
11 Orait Sofar+ bilong ples Nama i tok olsem:
2 “Yu ting ol toktok bilong yu bai mekim na mipela i pasim maus, a?
O yu ting man i mekim planti toktok, dispela i soim olsem tok bilong em i stret?*
3 Yu ting ol tok bilong yu i no gat mining bilong en, inap pasim maus bilong ol man, a?
Na yu ting i no gat man inap krosim yu long tok bilas yu mekim, a?+
5 Olaman! Mi laik bai God i toktok
Na opim maus bilong em na bekim tok long yu!+
6 Na em i ken kamapim as bilong savetingting long yu,
Long wanem, i gat planti samting i insait long savetingting.
Na yu bai luksave olsem God i bin isi long yu na lusim sampela rong bilong yu.
7 Savetingting bilong God i daun tumas, na yu ting yu inap kisim save long en?
O yu ting yu inap kisim save long olgeta samting bilong God i Gat Olgeta Strong?
8 Savetingting bilong em i antap moa winim heven. Yu ting yu inap mekim wanpela samting bilong painimaut as bilong en?
Savetingting bilong em i daun moa yet na i winim Matmat.* Yu ting yu inap mekim wanpela samting bilong kisim save long en?
9 Savetingting bilong em i longpela tru winim mak bilong graun olgeta
Na i bikpela moa yet na i winim mak bilong solwara.
10 Sapos em i kam na kalabusim wanpela man na bringim em long kot,
Orait husat inap long pasim em?
11 God i save sapos man i mekim pasin giaman.
Taim em i lukim man i mekim pasin nogut, yu ting em i no inap luksave long en, a?
12 Sapos wanpela wel donki inap karim pikinini bilong man
Orait man i no gat gutpela tingting em inap kisim gutpela tingting.
13 Yu mas stretim tingting bilong yu,
Na beten long God.
14 Sapos yu mekim wanpela pasin i no stret, orait yu mas lusim,
Na no ken larim pasin i no stret i stap long haus sel bilong yu.
15 Sapos yu mekim olsem, orait yu inap apim pes bilong yu we i no gat bagarap long en;
Na yu bai stap strong, na yu no pret.
16 Na yu bai lusim tingting long ol hevi bilong yu;
Na yu bai i no tingim ol moa, olsem wara i save ron i kam na i go.
17 Na laip bilong yu bai kamap gutpela tru olsem san i lait gut tru long belo;
Na ol hevi bilong yu olsem tudak, ol bai pinis olsem tulait i kamap long moning.
18 Yu bai i no pret, long wanem, yu bilip na wet long gutpela samting bai kamap bihain,
Na yu bai lukim olgeta samting bilong yu i stap gut, olsem na bai yu sindaun gut.
19 Taim yu slip, yu bai slip gut na i no gat wanpela bai mekim yu i pret,
Na planti manmeri bai kam askim yu long helpim ol.
20 Tasol ai bilong ol man nogut bai i go nogut;
Na ol bai i no gat rot bilong ranawe,
Na ol bai i wet tasol long dai i painim ol.”+