JEMS PAS EM I RAITIM

1 Mi Jems,+ mi wokboi bilong God na bilong Bikpela Jisas Krais, dispela pas i go long 12-pela traib em ol i go stap nabaut long planti hap:

Gude!

2 Ol brata bilong mi, taim kain kain traim i kamap long yupela, yupela i mas tingim olsem em samting bilong amamas tru long en,+ 3 yupela i save taim yupela i mekim olsem, bilip bilong yupela, em ol traim i mekim i kamap strong pinis, bai kamapim pasin bilong sanap strong.+ 4 Tasol yupela i mas larim pasin bilong sanap strong i inapim wok bilong en, olsem bai yupela inap stap gutpela olgeta na inap tru long olgeta samting, na yupela i no sot long wanpela samting.+

5 Olsem na sapos wanpela bilong yupela i sot long savetingting, orait em i mas wok yet long askim God,+ na God bai givim long em. Long wanem, God i save amamas long givim planti samting long ol man na em i no save krosim ol*+ taim em i mekim olsem.+ 6 Tasol dispela man i mas bilip na wok yet long askim,+ na em i no ken holim tupela tingting,+ nogat tru. Long wanem, man i gat tupela tingting em i olsem weiv bilong solwara em win i sakim i go i kam. 7 Tru tumas, dispela man i no ken ting em bai kisim wanpela samting long Jehova;* 8 tingting bilong dispela man i bruk nabaut.+ Long olgeta samting em i mekim em i save senisim nabaut tingting bilong em.

9 Brata i no gat nem i ken amamas, long wanem, nau em i kisim bikpela namba,+ 10 na brata husat i maniman em i ken amamas long em i no gat biknem moa.+ Long wanem, maniman bai pinis olsem plaua bilong gras i save drai. 11 San i save kam antap na em i hat nogut tru na i mekim gras i drai, na plaua bilong gras i save pundaun na naispela bilas bilong en i pinis, olsem tasol maniman bai pinis taim em i ron bihainim mani kago.+

12 Man husat i wok long sanap strong long taim bilong traim, em i ken amamas.+ Long wanem, taim God i orait long em, em bai kisim kraun bilong laip,+ em Jehova* i promis long givim long ol man husat i no lusim pasin bilong laikim em.+ 13 Taim traim i painim wanpela man, em i no ken tok: “God i traim mi.” Ol samting nogut i no inap traim God, na tu, God i no save traim man. 14 Tasol laik bilong bel bilong olgeta man wan wan i save traim ol, dispela laik i save giamanim ol na pulim ol.*+ 15 Na taim dispela laik i stap long bel i kamap bikpela, em i save kamapim sin; na taim sin i kamap pinis, em i save bringim dai i kam.+

16 Ol brata mi laikim tumas, yupela i no ken larim tingting bilong yupela yet i giamanim yupela. 17 Olgeta gutpela presen na olgeta presen i nambawan tru i kam long ples antap.+ Em i kam long Papa bilong ol lait bilong skai,*+ dispela Papa i no save senis senis olsem sedo i save senis senis.+ 18 Long laik bilong em yet, em i bin bringim yumi i kam long rot bilong tok i tru,+ bai yumi ken stap olsem namba 1 lain em i makim namel long ol manmeri em i bin wokim.+

19 Ol brata mi laikim tumas, yupela i mas save long dispela samting: Olgeta man i mas putim yau kwik long harim tok, na ol i no ken hariap long mekim toktok,+ na ol i no ken belhat hariap,+ 20 long wanem, belhat bilong man i no save kamapim stretpela pasin bilong God.+ 21 Olsem na rausim olgeta samting i no klin na olgeta pasin nogut.*+ Na long pasin isi, yupela i mas larim God i planim tok bilong em long bel bilong yupela, em dispela tok inap kisim bek yupela.

22 Tasol yupela i mas kamap ol man bilong bihainim tok,+ na no ken kamap man bilong harim nating tasol. Sapos yupela i harim nating tasol, yupela i larim ol tingting giaman i giamanim yupela yet. 23 Sapos wanpela em i man bilong harim nating tok na em i no man bilong bihainim tok,+ em i olsem wanpela man husat i lukim pes bilong em yet long mira. 24 Em i lukim em yet, na bihain em i go na kwiktaim em i lusim tingting long em i wanem kain man. 25 Tasol man husat i save lukluk gut long dispela lo i gutpela olgeta+ na i mekim man i kamap fri, na em i save mekim long olgeta taim, em i no man bilong harim nating tok na bihain lusim tingting long en, nogat, em i kamap man bilong mekim wok; em bai amamas long samting em i mekim.+

26 Sapos wanpela man i ting em i lotuim God,* tasol em i no bosim gut maus bilong em,+ orait dispela man i giamanim bel bilong em yet na em i lotu nating tasol. 27 Pasin bilong mekim lotu i klin na i no gat doti long en long ai bilong God Papa bilong yumi i olsem: yumi mas lukautim gut ol pikinini i no gat papamama+ na ol wido,+ na helpim ol long karim ol hevi bilong ol.+ Na yumi mas stap longwe olgeta long pasin doti bilong dispela graun.+

2 Ol brata bilong mi, yupela i bilip long Bikpela bilong yumi, Jisas Krais, em man i gat bikpela glori, tasol long seim taim yupela i save mekim gut long sampela man tasol, a?+ 2 Sapos wanpela man i kam long wanpela bung bilong yupela, na em i gat ol gol ring long ol pinga bilong em na werim naispela klos, na wanpela rabisman tu i kam, na em i werim ol klos i doti, 3 orait yupela bai mekim wanem? Ating yupela i amamas long dispela man i werim naispela klos na yupela i tokim em, “Yu sindaun long dispela gutpela hap,” na yupela i tokim dispela rabisman, “Yu sanap i stap” o, “Yu sindaun klostu long stul mi putim lek bilong mi long en.”+ 4 Sapos yupela i mekim olsem, yupela i mekim pasin bilong tingim wanpela lain i winim narapela lain,+ na yupela i kamap olsem ol jas i mekim ol disisen nogut.+

5 Ol brata mi laikim tumas, harim. Ol man i stap rabis long ai bilong ol man bilong graun, God i makim ol long kamap olsem ol man i pulap tru long bilip.+ Na em i makim ol tu long kisim Kingdom, em promis em i bin mekim long ol man husat i laikim em.+ Dispela em tru, a? 6 Tasol yupela i save semim ol rabisman. Tingim. Ol maniman i save daunim yupela,+ na pulim yupela i go long kot. 7 Ol i save tok nogut long dispela gutpela nem i stap long yupela. 8 Sapos long nau yupela i bihainim dispela lo i gutpela tru* i stap long Rait Holi olsem, “Yu mas laikim ol arapela man olsem yu laikim yu yet,”+ orait yupela i mekim gutpela pasin. 9 Tasol sapos yupela i bihainim yet pasin bilong mekim gut long sampela man tasol,+ orait yupela i mekim sin. Lo i kamapim ples klia olsem yupela i man bilong kalapim lo.+

10 Sapos man i bihainim olgeta tok bilong Lo, tasol em i kalapim wanpela hap tasol bilong en, orait em i kamap olsem man i brukim olgeta lo.+ 11 Long wanem, God i bin tok, “Yu no ken mekim pasin adaltri,”*+ na em i tok tu olsem, “Yu no ken kilim man i dai.”+ Olsem na sapos yu no mekim pasin adaltri, tasol yu kilim man i dai, orait yu kamap man bilong kalapim lo. 12 Yupela i mas wok yet long mekim ol tok na kamapim ol pasin olsem ol man em lo bai skelim ol. Em dispela lo bilong ol man i stap fri.*+ 13 Sapos man i no bihainim pasin bilong marimari long ol arapela, orait jas bai i no marimari+ long em taim em i skelim em. Pasin bilong marimari i save winim kot.

14 Ol brata bilong mi, sapos wanpela man i tok em i gat bilip, tasol em i no mekim ol gutpela wok,+ orait olsem wanem dispela inap helpim em? Dispela kain bilip i no inap kisim bek em, a?+ 15 Sapos wanpela bilong ol Kristen brata o sista i sot long klos* na i sot long kaikai bilong dispela de, 16 na wanpela bilong yupela i tokim em, “Yu ken i stap bel isi; hatim skin bilong yu na kisim gut kaikai,” tasol yupela i no givim em ol samting em i nidim, orait olsem wanem dispela tok inap helpim em?+ 17 Olsem tasol, sapos bilip i stap nating, na i no kamapim ol gutpela wok, orait dispela bilip i dai pinis.+

18 Tasol ating wanpela bai tok: “Yu gat bilip, na mi gat ol gutpela wok mi bin mekim.” Orait yu soim mi dispela bilip bilong yu, em bilip i no kamapim ol gutpela wok bilong en, na long rot bilong ol gutpela wok bilong mi, bai mi soim yu bilip bilong mi. 19 Yu bilip olsem i gat wanpela God tasol i stap, a? Em gutpela. Tasol ol spirit nogut tu i bilip olsem, na ol i guria.+ 20 Yu krankiman. Bilip i no kamapim ol gutpela wok, dispela kain bilip em i yusles. Yu laik save long dispela samting o nogat? 21 Tingim. Papa bilong yumi, Abraham, i bin putim pikinini bilong em, Aisak, antap long alta olsem ofa. Na long rot bilong ol wok Abraham i mekim God i kolim em stretpela man.+ 22 Yu luksave olsem bilip bilong em i poroman wantaim ol wok em i bin mekim, na long rot bilong ol wok bilong em, bilip bilong em i kamap gutpela olgeta.+ 23 Tok i stap long Rait Holi i kamap tru, em i tok: “Abraham i bilip long Jehova,* na God i tingim em olsem stretpela man,”+ na Abraham i kisim nem olsem pren bilong Jehova.*+

24 Orait nau yupela i luksave olsem long ol wok man i mekim, God bai kolim em stretpela man, na i no long rot bilong bilip tasol. 25 Olsem tasol God i bin kolim pamukmeri Rahap olsem stretpela meri long ol gutpela wok em i mekim. Rahap i bin kisim ol dispela man bilong lukstil* na em i bin lukautim ol, na bihain em i salim ol i go long narapela rot.+ 26 Tru tumas, bodi i no gat strong bilong laip i stap long en, em i dai pinis.+ Olsem tasol, bilip i no kamapim ol gutpela wok, dispela bilip i dai pinis.+

3 Ol brata bilong mi, planti bilong yupela i no ken kamap tisa. Yupela i save olsem yumi ol man husat i mekim wok tisa, God bai skelim moa yet wok bilong yumi winim ol arapela.+ 2 Planti taim yumi olgeta i save popaia.+ Sapos man i no popaia long tok em i mekim, orait dispela man i gutpela olgeta, na em inap bosim gut bodi olgeta bilong em. 3 Sapos yumi putim hap ain long maus bilong ol hos bilong mekim ol i bihainim tok bilong yumi, orait long dispela rot yumi bosim tu bodi olgeta bilong ol. 4 Na tingim tu ol sip: Ol i bikpela tru na strongpela win i save sakim ol i go, tasol stia bilong ol i liklik tru. Na man bilong stiaim sip inap yusim dispela liklik stia bilong stiaim sip i go long hap em i laikim.

5 Olsem tasol, tang em i wanpela liklik hap bilong bodi, tasol em i save hambak moa yet. Tingim! Liklik paia tru inap kirapim bikpela paia i kukim bikpela hap bilong bus! 6 Tang em i olsem paia.+ Tang i wanpela hap bilong bodi bilong yumi na em i pulap long pasin i no stret. Em i mekim bodi olgeta i kamap doti+ na em inap bagarapim laip bilong man, na em inap bagarapim ol samting wankain olsem Gehena* i save bagarapim ol samting. 7 Olgeta kain wel animal, ol pisin, ol palai samting, na ol animal i save stap long solwara, ol man i save mekim ol i stap aninit long ol na bosim ol. 8 Tasol i no gat wanpela man inap bosim gut tang. Em i wanpela samting nogut tru i hatwok long bosim, em i pulap long posin bilong kilim man i dai.+ 9 Yumi yusim tang long preisim Jehova,* em Papa, tasol yumi yusim tu long tok nogut long ol man em God i wokim ol i kamap “wankain olsem em yet.”+ 10 Tok bilong preisim God na tok nogut, tupela wantaim i save kamap long wanpela maus tasol.

Ol brata bilong mi, i no stret long ol dispela samting i kamap.+ 11 I no gat wanpela hulwara i save kamapim gutpela wara wantaim wara i pait, a? 12 Ol brata bilong mi, diwai fik i no inap karim ol oliv, na rop bilong ol greip i no inap karim ol fik, a?+ Na solwara i no inap kamapim gutpela wara bilong dring.

13 Husat namel long yupela i gat savetingting na i save kliagut long ol tok? Pasin bilong em long wokabaut stret, na ol samting em i mekim i mas kamapim pasin isi em savetingting i as bilong en. 14 Tasol sapos pasin bilong jeles nogut tru+ na pasin bilong kros*+ i stap long bel bilong yupela, orait yupela i no ken hambak+ na mekim tok giaman i daunim tok i tru. 15 Dispela em i no savetingting i lusim heven na i kam daun; em tingting bilong dispela graun,+ na bilong ol animal, na ol spirit nogut. 16 Pasin bilong jeles na kirapim kros* i save mekim ol samting i paul nabaut na i kamapim olgeta samting nogut tru.+

17 Tasol savetingting i kam long heven i mekim na pastaim man i stap klin,+ na bihain em i stap wanbel wantaim ol arapela,+ em i redi long bihainim tingting bilong narapela,+ em i redi long bihainim tok, em i marimari tru long narapela na kamapim ol gutpela pasin,+ em i mekim wankain pasin long olgeta man,+ na em i no bihainim pasin bilong tupela maus.+ 18 Na tu, sid bilong stretpela pasin ol i planim long taim bilong bel isi,+ ol i planim bilong ol man i save kamapim bel isi.*+

4 Wanem samting i as bilong ol kros na pait i kamap namel long yupela? As bilong en i olsem: Bikpela laik long inapim ol laik bilong skin i save kirapim pait insait long bodi bilong yupela.+ 2 Yupela i laikim samting, tasol yupela i no kisim. Yupela i wok long kilim ol man i dai na mangalim ol samting, tasol yupela i no inap kisim. Yupela i wok long kros na mekim pait.+ Yupela i no askim, olsem na yupela i no kisim. 3 Na taim yupela i askim, yupela i no kisim, long wanem, yupela i gat tingting nogut na yupela i askim. Yupela i tingting long kisim dispela samting bilong inapim tasol ol laik nogut bilong skin.

4 Yupela i olsem ol manmeri i mekim pasin adaltri.* Ating yupela i no save long dispela, a? Pasin bilong i stap pren bilong ol manmeri i stap longwe long God, dispela em pasin bilong birua long God. Man husat i laik i stap pren bilong ol manmeri i stap longwe long God, em i mekim em yet i kamap birua bilong God.+ 5 O yupela i ting i no gat as bilong dispela tok bilong Rait Holi olsem: “Pasin bilong bel nogut i stap insait long yumi, olsem na oltaim yumi save laikim kain kain samting,” a?+ 6 Tasol bikpela pasin helpim em God i save kamapim i winim tru dispela pasin bilong bel nogut. Olsem na Rait Holi i tok: “God i save sakim ol man i gat pasin antap,+ tasol em i save kamapim bikpela pasin helpim long ol man i gat pasin daun.”+

7 Olsem na yupela i mas daunim yupela yet na stap aninit long God;+ tasol yupela i mas sakim Devil,*+ na em bai lusim yupela na ranawe.+ 8 Yupela i mas i go klostu long God, na em bai kam klostu long yupela.+ Yupela ol sinman, yupela i mas mekim han bilong yupela i kamap klin.+ Na yupela ol man i gat tupela tingting, yupela i mas mekim bel bilong yupela i kamap klin.+ 9 Yupela i mas bel hevi na bel sori na krai.+ Yupela i no ken lap moa, yupela i mas bel sori, na yupela i no ken amamas moa, yupela i mas bel hevi. 10 Daunim yupela yet long ai bilong Jehova,*+ na em bai i litimapim yupela.+

11 Ol brata, stop long sutim tok long narapela narapela.+ Man i sutim tok long wanpela brata o skelim brata bilong em, em i sutim tok long lo na em i jasim lo. Na sapos yu jasim lo, orait yu no man bilong bihainim lo, nogat, yu kamap jas. 12 I gat wanpela man tasol em i Man Bilong Givim Lo na Jas,+ em dispela man tasol inap kisim bek man na bagarapim man.+ Olsem na yu husat na yu skelim narapela man?+

13 Harim, yupela husat i save tok: “Tude o tumora mipela bai go long dispela taun na stap inap wanpela yia, na mipela bai mekim wok bisnis na kisim sampela profit,”+ 14 tasol yupela i no save wanem samting bai kamap long yupela tumora.+ Yupela i olsem smok bilong moning i kamap na i save stap liklik taim tasol na bihain em i lus nating.+ 15 Mobeta yupela i mas tok: “Sapos em laik bilong Jehova,*+ orait bai yumi stap laip na mekim ol samting yumi tingting long mekim.” 16 Tasol nau yupela i amamas long pasin hambak bilong yupela yet. Olkain pasin hambak olsem, em i pasin nogut tru. 17 Olsem na sapos man i save long stretpela pasin em i mas mekim, tasol em i no mekim, orait em i mekim sin.+

5 Yupela ol maniman, harim! Yupela i mas krai na singaut nogut long ol hevi i laik kamap long yupela.+ 2 Olgeta kago bilong yupela i sting pinis, na ol binatang i kaikaim pinis ol klos bilong yupela.+ 3 Ol gol na silva bilong yupela i ros pinis, na dispela ros i kamapim ples klia asua bilong yupela, na ros bai kaikaim skin bilong yupela. Ol samting yupela i bin bungim bai kamap olsem paia long taim bilong las de.+ 4 Harim! Pe yupela i no bin givim long ol wokman husat i kamautim ol kaikai long ol gaden bilong yupela, ol dispela pe i wok long singaut. Na ol man bilong kisim kaikai ol i wok long singaut bilong kisim helpim, na dispela singaut bilong ol i kamap long yau bilong Jehova,* bosman bilong bikpela lain ami.*+ 5 Yupela i bin kisim planti gutpela samting na yupela i save bihainim tru pasin bilong inapim laik bilong bodi long dispela graun. Yupela i save kaikai planti na i kamap patpela i go inap long de bilong kilim yupela i dai.+ 6 Yupela i bin kotim stretpela man na kilim em i dai. Olsem na em i sakim yupela.

7 Orait ol brata, yupela i mas bihainim pasin bilong i no les kwik i go inap long taim Bikpela i kam i stap.+ Harim! Fama i wok long wetim ol gutpela kaikai i kamap long graun, na em i no save les kwik. Em i wetim taim bilong namba 1 ren na taim bilong laspela ren i kam.*+ 8 Yupela tu i no ken les kwik;+ strongim bel bilong yupela, long wanem, taim bilong Bikpela long i kam i stap, dispela taim i klostu.+

9 Ol brata, yupela i no ken kros* long narapela narapela, nogut yupela i gat kot.+ Harim! Jas i sanap pinis long dua. 10 Ol brata, bihainim gutpela eksampel bilong ol profet long pasin bilong karim pen na hevi+ na i no les kwik,+ em ol i bin autim tok long nem bilong Jehova.*+ 11 Harim! Mipela i tingim olsem ol man husat i sanap strong na karim hevi, ol i stap amamas.*+ Yupela harim pinis stori bilong Jop long em i bin sanap strong+ na long ol samting Jehova* i bin mekim long em,+ olsem Jehova* i gat pasin bilong sori tru na marimari.+

12 Moa yet, ol brata bilong mi, yupela i mas stop long mekim tok tru antap, no ken kolim heven o graun o kolim ol arapela tok bilong mekim tok tru antap, nogat. “Yes” bilong yupela i mas minim yes tasol, na “Nogat” bilong yupela i mas minim nogat tasol,+ na bai God i no ken kotim yupela.

13 Olsem wanem? I gat wanpela namel long yupela husat i karim pen na hevi? Orait em i no ken lusim pasin bilong beten.+ I gat wanpela i amamas i stap? Orait em i ken singim ol song bilong preisim God.+ 14 I gat wanpela namel long yupela i sik? Orait em i mas singautim ol hetman+ bilong kongrigesen i kam, na ol i ken beten long em na long nem bilong Jehova* ol i ken welim em long oil.+ 15 Beten bilong man i bilip bai mekim sikman* i kamap orait, na Jehova* bai helpim em long kamap strong. Na tu, sapos em i bin mekim sin, orait God bai fogivim em.

16 Olsem na yupela i mas autim sin bilong yupela+ long narapela narapela na beten bilong helpim narapela narapela, na bai yupela i ken kamap orait. Beten bilong stretpela man i gat bikpela pawa na i mekim gutpela wok.+ 17 Elaija i wanpela man wankain olsem yumi, tasol taim em i beten strong long ren i no ken i kam, ren i no bin pundaun inap 3-pela yia na 6-pela mun.+ 18 Na em i beten gen, na ren i kam daun long skai na kaikai i kamap long graun.+

19 Ol brata bilong mi, sapos wanpela namel long yupela i lusim tok i tru na narapela i kirapim em long kam bek, 20 orait yupela i mas save olsem, man i kirapim sinman long lusim rot nogut+ em i bihainim, dispela man bai seivim sinman na sinman i no ken i dai, na tu, em bai karamapim planti sin bilong dispela sinman.+