Pes 2

Long nau ol gavman na planti manmeri tu i tingting planti long ol pipia i hip i go bikpela tru long olgeta hap na i no gat ples moa bilong tromoi; na ol man i gat wok long lukautim ol wara na win na graun samting na bai i no ken bagarap, ol tu i tingting planti long dispela. Ol i tok em i wanpela bikpela hevi tru bilong dispela taim. Planti nius i kamapim bikpela tok long ol pipia bai bagarapim dispela graun, na ol dispela nius i tok, i no longtaim na ol dispela pipia bai kisim ples na karamapim yumi olgeta! Na het-tok bilong wanpela nius (Newsweek) i tok olsem: “Planti Pipia Tumas: Dispela Samting Bilong Bagarapim Graun i Kamap long Hap Bilong Yumi Tu.” Na narapela nius (U.S.News & World Report) i tok, “Planti ton pipia i stap na i no gat ples bilong tromoi.” Na narapela nius gen (Time) i tok, “Pipia i pulap long olgeta hap, tasol ol ples bilong tromoi i pulap olgeta na i hatwok long painim sampela ples moa.” Na long wanpela nius bilong Paris (International Herald Tribune) i gat het-tok olsem: ‘Pipia Bilong Ol Kantri long Wes i Kam Pulap long Ol Kantri i No Gat Planti Mani Samting.’