Mi Ken Mekim Wanem na Bai Ol Wanlain i No Pulim Mi?

Pas bilong wanpela plisman bilong Sikago long Amerika i soim olsem i gutpela sapos yumi save long bekim bilong dispela askim i stap antap. Em i tok:

“Long Janueri 15, 1990, mi sekim ol samting bilong wanpela yangpela kalabusman i gat 18 krismas. Em i bin ranawe long Sikago na ol i holim em long Misisipi na kisim em i kam bek long Sikago. Taim ol polis i sekim kalabusman ol i mas kisim ol mani kago samting em i holim. Dispela yangpela i holim wanpela buk, nem bilong en, Sampela Askim Bilong Ol Yangpela​—Ol Gutpela Bekim.

“Mi askim em, ‘Yu bin kaunim dispela buk?’

“Em i tok, ‘Yesa. Taim mi hait long ples Misisipi mi bin wok long wanpela bikpela fam. Long dispela taim tupela Witnes Bilong Jehova i givim dispela buk long mi.’ Nau em i kirap long krai​—em i krai bikpela tru. Em i krai i stap na toktok wantaim, na em i tok: ‘Planti taim mi kaunim dispela buk, na wanpela hap mi kaunim kaunim em i tok, “Mi Ken Mekim Wanem na Bai Ol Wanlain i No Ken Pulim Mi?” ’ Em i tok moa: ‘Sapos long 3-pela o 4-pela yia bipo mi bin kaunim dispela buk, mi no ken i stap hia long nau.’

“Ol polis i kisim em i go na mi kaunim ripot bilong ol na ol tok dispela yangpela man i bin givim long polis. Em i bin tok, ‘Gopas bilong lain raskol mi bin stap long en i bin tok long mi mas go sutim wanpela man long narapela lain raskol, long wanem, em i bin maketim drak koken long hap bilong mipela. Mi bihainim tok bilong gopas. Mi pret long ol wanlain bilong mi i no ken laikim mi sapos mi no bihainim tok bilong gopas. Mi laik bai ol i mas laikim mi.’

“Ol polis i tok dispela yangpela man i bin kilim wanpela man. Sapos kot i ting em i gat asua, em bai stap long kalabus bilong ol man em kot i makim bilong ol i mas i dai. Yangpela man hia i kisim dispela hevi long wanem, em i bin bihainim tok bilong ol wanlain bilong em.”

Baibel i kamapim stretpela save na soim gutpela rot long yumi bilong helpim yumi long winim planti hevi i save kamap long nau. Sapos yu laik kisim sampela save moa o yu laik bai wanpela man i lainim yu long tok bilong Baibel long haus bilong yu yet, no gat pe, salim pas na toksave long I.B.S.A., Box 636, Boroko, N.C.D., o lukim atres i stret long yu long pes 5.

This article is repeated again in g93 3/8. This article is also found in w-E 90 8/15.