Ol i Amamas Long Rasia

I GAT as na dispela liklik meri i amamas long Levov. Em i wanpela bilong ol lain inap olsem 74,252 em ol i bung long Rasia bilong mekim wanpela kibung Kristen, na em i kisim wanpela bilong dispela nupela buk long tok ples Rasia, em Nambawan Man Tru i Winim Olgeta Narapela Man. Maski gavman i pasim ol Witnes Bilong Jehova long mekim kibung long bipo, ol Witnes i mekim 7-pela kibung long 1991. Ol man i go long kibung long olgeta wan wan ples, namba bilong ol i stap long pes paslain long dispela.

Wanpela bilong ol dispela kibung i kamap long biktaun Alma-Ata, long Kasakstan, na ol man long hap bilong Rasia, na Usbekistan, na Kegisia, na Tadsikistan, na Tekmenistan, ol i kam bung. Long Alma-Ata inap olsem 6,000 manmeri i amamas long kisim dispela nupela buk. Long kibung long Usoli-Sibirskoi long Saibiria, inap olsem 4,000 i bung na taim olgeta i kisim wanpela nupela buk i no gat pe long en, man bilong lukautim stediam i kirap nogut na em i tok: “Dispela em i wanpela mirakel!”

Long Kiev, taim sampela plisman na paiaman i lukim dispela buk, ol i askim ol Witnes long wanpela buk, na ol i tok: “Mipela i bin lukautim yupela na stap wantaim yupela long dispela kibung, olsem na mipela laik kisim dispela buk.” Wanpela kepten bilong ol polis i laik save long ol i wokim dispela buk we, na ol i bin wokim hamas buk.

I kam inap long nau ol i bin wokim olsem 12 milion bilong dispela buk long 60 samting tok ples, ol i wokim long ol tok ples i no planti man i save long en, olsem: Bislama, Efik, Ewe, Ga, Igbo, Rarotonga, Sepedi, Sona, Songa, Swana, Twi, Venda.

Planti milion man long olgeta hap bilong graun i wok long kisim amamas taim ol i kaunim dispela gutpela nupela buk i gat 448 pes long en, i stori long i stap na wok bilong Jisas Krais. Sapos yu laik kisim save moa long Jisas na ol wok bilong em long truim laik bilong God, yu ken raitim pas i go long I.B.S.A., Box 636, Boroko, N.C.D., Papua New Guinea, o lukim atres long pes 5 i stret long yu.