“Ol Man, Kirap!”
LONG Ogas 22, 1946, dispela nius Kirap! long tok Inglis i kamap nupela, na i gat dispela narapela kain het-tok long namba wan pes, olsem “Ol Man, Kirap!” Ol i wokim olsem 500,000 nius Kirap! long 10-pela tok ples. Long nau ol i wokim olsem 13 milion samting long 67 tok ples. Tasol bilong wanem ol i wokim dispela nius? Olsem wanem em inap helpim yu?
Long yia 1919 taim ol i wokim nupela dispela nius, em i gat nem olsem The Golden Age. Bihain, long yia 1937 ol i senisim nem na kolim dispela nius Consolation. Long nau dispela nius i gat nem Kirap! na dispela nius i bin i stap inap 73 yia pinis. Bilong wanem ol i ting i gutpela sapos ol i wokim narapela nius bilong poromanim nius Wastaua?
Taim ol i wokim namba wan nius (The Golden Age) long Oktoba 1, 1919, nius i tok: “Olgeta lain politik, na lain bisnis, na lain manmeri bilong graun i gat bikpela hevi. Long olgeta de ol hevi i wok long kamap bikpela, na bikpela save bilong ol man i no inap stretim.” Narapela tok ol i mekim long taim stret bilong en, em i olsem: “Long olgeta de pe bilong ol samting i wok long i go antap tru, na ol man i no inap kisim ol samting i stret ol i mas kisim, na bikpela hangre i stap.” Ol dispela hevi i stap yet, a?
Taim ol man bilong wokim nius Kirap! i stori long ol hevi i wok long painim yumi, ol i stori tu olsem i gat wanpela rot tasol bilong stretim ol dispela hevi—em stretpela wok king bilong Kingdom bilong God long han bilong Krais Jisas. Olpela Testamen na Nupela Testamen bilong Baibel i tok profet long “nupela skai na nupela graun,” olsem nupela gavman bilong heven bai bosim nupela lain manmeri hia long graun. (Aisaia 65:17; 2 Pita 3:13; KTH 21:1-4) Taim Kirap! i stori long ol hevi i kamap long graun na ol narapela stori, dispela nius i tok, God tasol inap stretim ol dispela hevi. Na dispela nius i helpim ol man long karim kain kain hevi ol i save kisim.
Kirap! i save strongim bel bilong ol manmeri i bel hevi na ol i hevi long ol pasin nogut bilong graun em Satan i save kamapim. Yumi ken tok tru, olsem dispela nius i bin tok long 1946: “Dispela nius inap lainim ol man bilong olgeta lain, na kantri, na skin, em ol i gat stretpela bel, na bai ol inap kisim planti gutpela save.” Sapos yu laik kisim sampela save moa long dispela nius, go lukim ol lain Witnes Bilong Jehova long wanpela Haus Kingdom klostu long yu, o raitim pas i go long ol lain i wokim dispela nius. Lukim atres i stret long yu long pes 5.