Ol i Stori Long Ol Samting i Painim Yumi

Wanpela meri long Potyugal, em i rait i go long brens-ofis bilong Sosaiti Was Taua long dispela kantri na em i askim ol long salim nius Kirap! i go long em. Em i bin kisim wanpela nius Wastaua, na dispela i kirapim em long rait i go long brens-ofis. Em i bin kaunim na em i laikim tru ol tok i stap insait, na em i tok:

“Mi laik tok tenkyu long yupela long nius Wastaua em mi kisim nau long pos ofis. Ol stori i stap insait long dispela nius i helpim mi tru. Na nius Kirap! i stori long ol samting i save painim yumi long wan wan de na olsem wanem Baibel inap helpim yumi long stretim ol dispela hevi. Taim mi malolo mi laik kaunim dispela nius tu.

“Inap wanpela mun nau mi bin stadi long Baibel, na mi save ol nius samting bilong yupela inap helpim tru ol man.

“Mi laik tok tenkyu gen long olgeta manmeri em ol i givim taim na strong bilong ol long helpim ol manmeri olsem mi long save long tok bilong Kingdom na Tok Bilong Jehova.”

Ol Witnes Bilong Jehova i wanpela oganaisesen em lain bilong ol i stap long olgeta hap bilong graun. Winim 4 milion sumatin bilong Baibel i save helpim ol narapela long kisim sampela save moa long laik bilong God. Sapos yu laik kisim sampela save moa o yu laik bai wanpela man i lainim yu long tok bilong Baibel long haus bilong yu yet, no gat pe, salim pas na toksave long I.B.S.A., Box 636, Boroko, N.C.D., o lukim atres i stret long yu long pes 5.