Ol Narapela Kain Lait Antap—Ol i Kam We?

OL LAIT bilong skai long hap bilong not na long saut klostu long ples ais, em ol i kolim orora, i save kirapim ol man long ol dispela hap long tingting planti long dispela narapela kain samting. Ol saveman i ting, insait long graun ol hatpela ain i save kamap olsem wara na i save kam antap na i go daun na taim graun i tantanim, ol dispela ain i olsem wara i tanim tanim tu. Dispela i save kamapim wanpela kain strong olsem paua na dispela paua i kamapim wanpela kain strong bilong pulim ol samting. Ol i kolim dispela strong, magnetik fil. Ol liklik liklik samting olsem pipia i lusim san i kamap ples klia long skai long rot bilong ol magnetik fil. Na em i kamap klia moa taim planti moa bilong ol dispela samting i lusim san na i kam daun. Magnetik fil i save pulim na kalabusim strong bilong san. Dispela i save kirapim ol planti liklik liklik atom i stap nabaut antap long skai namel long ol magnetik fil long hap not na hap saut klostu long ples ais long kamapim ol lait i gat kain kain kala. Taim strong bilong san i holim ol atom bilong ges oksijen na ges naitrojen, nau retpela na grinpela na blupela lait i kamap. Planti lait arora i grinpela, na sampela hap bilong en i retpela na blupela. Long hap not ol i kolim dispela lait orora borialis, na long hap saut ol i kolim orora ostralis.

Man bilong raitim Song i tok: “Skai i soim yumi olsem God i nambawan tru. Olgeta samting bilong antap i soim yumi gutpela wok bilong em.” (Song 19:1) Sapos yu laik kisim sampela save moa long dispela Man i bin wokim ol samting bilong skai antap, yu ken painim ol Witnes Bilong Jehova long hap bilong yu, o yu ken salim pas long lain i raitim dispela nius.​—Lukim pes 5.

[Piksa Kredit Lain long pes 32]

NASA photo