Hevi Bilong Belhat
TAIM yu belhat dispela i givim bikpela hatwok long klok bilong yu. Long Yunivesiti Stanford long Amerika ol i bin skelim dispela samting na kisim save olsem: Taim ol dokta i askim ol man i gat sik bilong klok long tingim bek ol samting i bin mekim ol i belhat na ol i belhat yet, strong bilong klok long pamim gut blut i go daun liklik olsem 5 pesen, na bihain em i go antap long mak tru. Ol dokta i ting dispela i bikpela samting, long wanem, ol i kisim save olsem ol man bilong belhat inap kisim sik bilong klok, winim ol man i stap bel isi.
Dokta Gail Ironson em gopas bilong ol dokta bilong skelim ol dispela sikman na em i tok: ‘Taim ol sikman i bin tingim bek samting i bin mekim ol i belhat na nau klok bilong ol i no pamim strong blut, dispela i bikpela samting. Ol sikman i tok, taim ol i tingim bek hevi i bin mekim ol i belhat, ol i belhat liklik. Olsem na ating strong bilong klok long pamim blut i bin go daun tru taim ol i bin belhat tru.’
Em namba wan taim ol dokta i tok, belhat inap senisim wok bilong klok. Na tru, yumi no ken tok, belhat tasol i as na ol man i kisim sik bilong klok. Lo bilong skin ol i kisim long papamama o kaikai o man i no eksasais, ol dispela tu inap kamapim sik bilong klok. Tasol ol saveman i ting belhat i bikpela samting bilong kamapim dispela sik.
Longpela taim liklik ol dokta i save, belhat inap bagarapim skin bilong man. Em inap mekim mak bilong blut i go antap na senisim wok bilong ol rop blut na kamapim sotwin na kamapim sik long lewa na sampela sik moa. Na ol i ting belhat inap mekim sampela sik i go bikpela moa, olsem sotwin, sik bilong ai, grile, ol sua, sik long tit, na taim man i kaikai, kaikai i no sindaun gut long bel.
Olsem na yumi inap stap gut long ol samting bilong God na skin sapos yumi bihainim tok bilong Baibel long ‘lusim pasin bilong belhat,’ na ‘no ken kros,’ na ‘no ken belhat kwik.’ Man i gat “gutpela tingting” em i “no save belhat kwik.” Tru tumas, “sapos man i stap bel isi, orait bodi bilong en bai i stap gut.”—Song 37:8; Saveman 7:9; Sindaun 14:29, 30.
Sapos yu laik kisim sampela save moa o yu laik bai wanpela man i lainim yu long tok bilong Baibel long haus bilong yu yet, no gat pe, salim pas na toksave long I.B.S.A., Box 636, Boroko, N.C.D., o lukim atres i stret long yu long pes 5.