Ol Kobra Long Sri Lanka i Harim Tok

“Ol i save pasim yau bilong ol, olsem snek [i mekim].”​—Song 58:​4, 5.

Wanpela nius (The New York Times) bilong Janueri 10, 1954, i stori long Song 58:​4, 5 aninit long het-tok: ‘Ol Snek i Save “Harim” Musik?’ Nius i tok: ‘Dokta David I. Macht em saveman bilong skelim ol marasin samting long Haus Sik Mount Sinai long Baltimo, long Amerika. Long olgeta hap em i gat nem, long wanem, em i gat bikpela save long gip bilong snek kobra. (Ol i save mekim wok long gip bilong kobra bilong oraitim sampela sik long blut bilong man.) Dokta Macht i tok, taim em i mekim wok long glasim ol kobra, em i bin bungim sampela dokta Hindu bilong ol narapela narapela hap bilong India. Em ol dokta i bin kisim bikpela skul. Ol dispela dokta Hindu i wanbel long tok, snek kobra i save harim sampela musik taim man i winim mambu samting. Na ol i tok, sampela kain musik i save amamasim tru snek kobra. Na Dokta Macht i tok, ol man i save tokim ol pikinini India i stap long ples, long ol i no ken singsing sapos ol i pilai ausait na em tudak pinis, nogut singsing bilong ol i pulim snek kobra i kam. Na Dokta Macht i tok moa, planti taim Sekspia [em wanpela man bilong bipo i gat nem] i bin tok, olgeta snek i yaupas. Bipo planti man i gat dispela tingting kranki. Tasol Dokta Macht i tok, man bilong raitim Song 58, ves 5, i tok stret taim em i tok, snek inap harim tok.’

I gat wankain tok long wanpela nius (Grzimek’s Animal, Sielmann’s Animal World) bilong Jemani, bilong Julai 1981 long pes 34 na 35. Man bilong raitim dispela stori i tok, bipo i gat wanpela snek kobra bilong bus i kam na slip insait long haus bilong wanpela kain anis long hap graun bilong em long Sri Lanka. Olsem na em i bin askim wanpela man bilong pilaim musik long kam na holim snek na mekim em i danis. Man i tok: ‘Em i sindaun klostu long dispela haus bilong anis na winim mambu bilong em. Em i winim mambu longpela taim liklik, olsem na mi ting snek i no ken mekim wanpela samting. Tasol nau het bilong snek i lusim hul. Taim snek i no opim yet maus bilong en, kwiktaim man bilong pilaim musik i holim het bilong en.’ Nau dispela man India i kirapim snek long danis.

Olsem na yumi ken ting olsem snek kobra inap ‘harim nek bilong saveman bilong mekim musik.’​—Baibel New World Translation of the Holy Scriptures​—With References, Appendix 7A, pes 1583.