Em i Kirapim Em Long Beten

Karen, wanpela Witnes Bilong Jehova long Nu Yok, em i tok, em i bin salim buk Harim Tok Bilong Bikpela Tisa long mama bilong em. Karen i raitim pas na tok: ‘Mi laik bai mama i givim dispela buk long pikinini meri bilong brata bilong mi, Jamie, na em i ken kaunim long nait. Jamie i gat 9-pela krismas. Mi raitim pas i go long Jamie na tokim em long kaunim dispela buk long olgeta nait long haus bilong bubu mama. Na sapos em i mekim olsem em bai kisim gutpela tingting taim em i laik slip.’

Mama bilong Karen em i no wanpela Witnes Bilong Jehova na bihain em i tokim Karen, taim Jamie i go long bet em i kirap na kaunim buk. Long moningtaim Jamie i tokim bubu mama, paslain long em i laik slip em i bin beten long God i ken helpim liklik brata bilong em. (Ol dokta i laik katim em.) Mama bilong Karen i kirap nogut long tok bilong Jamie, long wanem, em i ting bipo Jamie i no bin beten.

Karen i tok: ‘Dispela buk i gat strong sapos em inap kirapim pikinini i gat 9-pela krismas long beten bihain long em i kaunim liklik hap tasol bilong en. Dispela i bin helpim mi long pilim tru strong bilong dispela ol kain buk. Na ating dispela i bin helpim mama bilong mi, long wanem, em i tok, em i lukim planti askim insait long buk na buk i no lainim man long ol stori tasol, nogat; em i skulim man long ol stretpela pasin.’

Sapos yu laik kisim wanpela buk Harim Tok Bilong Bikpela Tisa o yu laik bai wanpela man i lainim yu long tok bilong Baibel long haus bilong yu yet, no gat pe, salim pas na toksave long IBSA, Box 636, Boroko, N.C.D., o lukim atres i stret long yu long pes 5.