Em i Kirap Nogut Long Ol i Wokim Planti Nius Kirap!

WANPELA MERI BILONG KAUNIM Kirap! long Minesota, Amerika, i save wok long wanpela koles. Wanpela taim wanpela saveman bilong ol samting i stap insait long solwara, em Sam LaBudde, i laik kam bilong givim wanpela tok. Het-tok bilong dispela tok em i laik givim i olsem: “Ol Dolfin i Go We?” Dispela meri i tingim wanpela Kirap! (Mas 8, 1993) i gat stori “Kisim Pis Long Traipela Umben,” na stori i bin kamapim sampela tok bilong dispela saveman. Olsem na meri i kisim dispela Kirap! i go wantaim em taim em i go harim tok bilong dispela saveman.

Meri i tok: ‘Long dispela nius mi raitim liklik pas i go long Mista LaBudde. Mi tok, ating em bai amamas long save dispela gutpela stori bai kamap long olgeta hap long planti tok ples, long wanem, olgeta taim ol i save prinim 13 milion bilong dispela nius. Mi raitim nem bilong mi na lusim Kirap! long tebol. Mi bin opim long dispela stori long traipela umben. Orait, nau mi sindaun.

‘Bihain liklik mi lukim wanpela man i go long tebol na kisim dispela nius na kaunim. Bihain em i singaut na askim mipela, husat i bin lusim dispela nius long tebol. Mi apim han bilong mi na tokim em mi bin lusim. Em i kam na sindaun klostu long mi. Em i tok tenkyu long mi na tok em i amamas taim wanpela i givim sampela nius samting i stori long wok em i save mekim. Tasol em i tok, ating mi popaia taim mi raitim tok olsem olgeta taim ol i prinim 13 milion bilong dispela nius. Em i ting mi laik raitim 13 tausen, tasol mi popaia na raitim 13 milion. Mi opim nius i go long namba 2 pes bilong dispela nius na soim em olsem ol i save prinim 13 milion. Em i kirap nogut tru. Na em i kirap nogut long save ol i prinim dispela nius long 73 tok ples. Na em i ting dispela nius i stap long Amerika tasol, ol narapela hap nogat. Tasol mi tokim em, dispela nius i save go long olgeta hap.’

Sapos yu laik kisim wanpela Kirap! long rot bilong posofis, plis salim pas na toksave long IBSA, Box 636, Boroko, N.C.D., o lukim atres i stret long yu long pes 5.