Kirap! i Helpim Wanpela na Em i No Bagarap

Taim wanpela Witnes Bilong Jehova long Ekwado i wetim mekenik i stretim ka bilong em, meri bilong mekenik i tokim Witnes, em i tingting planti long liklik pikinini man bilong em, Byron. Long olgeta wik, inap 5-pela o 6-pela taim skin bilong em i guria na spet i kamap long maus. Ol dokta i no save long as bilong sik, maski ol i bin kisim Byron i go long ol bikpela dokta long Kwito, em nambawan biktaun.

Witnes i tok: “Taim mi stori wantaim dispela meri, mi lukim wokman i penim wanpela ka, na mi tingim stori bilong wanpela Kirap! i tok long gip nogut insait long ol samting olsem pen, na taim man i kisim sik long dispela marasin nogut, skin bilong em inap guria na spet i kamap long maus. Mi tokim meri bai mi bringim dispela Kirap! i kam long em.”

Taim papamama bilong Byron i kaunim pinis dispela stori long Kirap!, ol i askim dokta long glasim gen skin bilong Byron. Dokta i painim bikpela hap marasin nogut long blut bilong Byron. Dokta i givim marasin long pikinini, na papamama i mekim sampela samting bambai Byron i no ken stap klostu long pen, olsem na skin bilong em i kamap gutpela. Witnes i tok: “Insait long 4-pela mun i go pinis, Byron i no bin kisim dispela sik. Papa i toktok wantaim planti dokta long dispela sik i bin painim pikinini, na oltaim em i save litimapim Kirap! na tokim ol dokta, dispela nius i bin helpim pikinini na em i no bagarap. Nau sampela bilong ol dispela dokta i save kaunim Kirap!”