Bihain Gutpela Samting Tru Bai Kamap Long Graun
NIUS Globe and Mail bilong Toronto i kamapim ripot olsem: “Ol saveman i tok, long nau Graun i hat moa, winim 600 yia i go pinis.” Long 1995 san i strong tumas long sentral Yunaitet Stets, olsem na long Sikago winim 500 manmeri i bin i dai. Wankain bikpela hevi long san i bin kamap long India na Ostrelia, na long Inglan em “namba 3 taim insait long 200 yia na taim bilong san i bin hat moa.”
Wanem as na dispela samting i kamap? Saveman Henry Hengeveld, bilong lain Environment Department long Kanada, em i tok: “Planti samting i kamapim klia olsem ol man i as bilong ol samting i paulim taim bilong san na kol na ren long olgeta hap bilong graun.” Nius Globe and Mail i tok, “dispela narakain pasin long taim bilong san na kol na ren i wankain long ol samting kompyuta i makim long graun i go hat. Ol man i ting dispela hevi i kamap, long wanem, marasin nogut bilong bagarapim win i save kamap taim ol man i wok long kukim blakpela ston kol samting.”
Ol man bilong saiens i wok long tok pait yet long olsem wanem graun i wok long kamap hat moa. Tasol buk The New Encyclopædia Britannica i tok: “Ol man i wok hariap long bagarapim win bilong antap, tasol ol i no kisim save hariap long wok bilong en.”
Tasol gutpela tru Baibel i tokim yumi olsem, graun bai stap ‘oltaim.’ (Saveman 1:4) Long wanem, Man bilong wokim olgeta samting, God Jehova, i no inap larim ol man o wanpela samting i bagarapim graun. Nogat. Em bai “bagarapim ol man i bin bagarapim graun.”—KTH 11:17, 18.
Na tu, Baibel i tok God Jehova bai kirap mekim sampela samting long graun na ol manmeri bilong bihainim tok, ol i ken stap gut bihain. “Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.” Yumi ken amamas long save, ol samting bai kamap long graun long bihain i stap long han bilong God, long han bilong ol man nogat!—Song 37:11; 72:16; Aisaia 65:17-25; 2 Pita 3:13.
Sapos yu laik kisim ol nupela nius Kirap!, yu ken askim ol Witnes Bilong Jehova long hap bilong yu o raitim pas i go long atres long pes 5 em i stret long yu.
[Piksa Kredit Lain long pes 32]
NASA photo