“Yu Bai Kisim Gutpela Save Moa Taim Yu Kaunim Kirap!”
EM TOK tisa i bin mekim long Pasquale, em wanpela yangpela manki Witnes i skul long wanpela koles long Bari, Itali, taim em i askim tisa long givim em ol pepa bilong em i stori long pasin bilong kisim drak. Bipo dispela tisa i bin tingting nogut long ol Witnes Bilong Jehova. Wanem samting i mekim na tingting bilong em i senis?
Pasquale i tok: “Long pinis bilong wanpela klas, tisa i bin askim ol sumatin long helpim em long painim sampela tok i stori long pasin bilong mekim nogut long ol pikinini, long wanem, em i redim wanpela bikpela tok long dispela samting. Mi tingim sampela stori Kirap! i bin kamapim long dispela samting na sampela stori moa olsem: ‘Husat i Mas Lainim Pikinini Long Ol Samting Bilong Maritpasin?’ (Disemba 8, 1992). Mi save tisa bilong mi i no laikim ol Witnes, olsem na mi askim wanpela wanklas long givim ol nius long em.”
Pasquale i stori long samting i bin kamap sampela de bihain, taim em i askim tisa long givim em ol pepa bilong em long pasin bilong kisim drak: “Em i no bin mekim wanpela tok hariap. Nogat. Em i kirap sanap na i kam long mi bilong sekanim mi. Em i tok, bipo em i no laik kisim ol nius bilong ol Witnes Bilong Jehova, long wanem, em i ting ol nius i save kamapim ol tok i isi na i bilong ol pikinini tasol. Tasol bihain long em i kaunim, em i senisim tingting bilong em. Em i tok, ol tok long nius i gutpela bilong helpim pasin na sindaun bilong ol man. Em i tok, sampela tok bilong Kirap! bai kamap long tok em i wok long redim.”
Na olsem wanem long askim bilong Pasquale long kisim ol pepa bilong tisa long pasin bilong kisim drak? Tisa i tok, “Mi amamas tru long givim ol pepa long yu, tasol yu bai kisim gutpela save moa taim yu kaunim Kirap! Em wanpela nius i save kamapim ol gutpela tok bilong helpim yumi, na i gutpela bilong helpim ol man i skul long yunivesiti.”
Nius Kirap! i save stori long ol hevi i kamap long nau na i wok strong long kamapim ol gutpela tok bilong helpim ol man em ol i karim kain kain hevi long olgeta de. Sapos yu laik save olsem wanem ol tok bilong Baibel inap helpim yu, askim ol Witnes Bilong Jehova, em ol i save wokim nius Kirap!, o raitim pas long atres em i stret long yu long pes 5.