“Em i Putim Stori Long Niuspepa”
Em tok wanpela yangpela meri long Kanada i bin mekim long pas em i bin raitim i go long Sosaiti Was Taua bilong tok tenkyu. Em i bin insait long wanpela resis bilong mekim toktok long ai bilong ol man long skul, na ol tok em i bin kamapim i amamasim tru wanpela jas bilong dispela resis na jas i kisim tok orait bilong putim ol dispela tok long niuspepa.
Wanem as bilong tok yangpela meri i kamapim? Em i tok: “Klas bilong mi ol i save mauswara, na ol meri i mekim moa yet dispela pasin.” Olsem na em i kisim ol tok bilong em long wanpela Kirap! em i bin kaunim na em i mekim tok bilong em. Nius The Review, bilong Naiagra Fols, Onterio i bin kamapim sampela hap bilong ol tok bilong meri aninit long het-tok, “Mauswara Inap Nogutim Man; Yu Yet Bai Pilim Olsem Wanem?”
Wanem samting tru i bin amamasim dispela jas? Tingim sampela hap tok meri i bin kamapim, olsem: “Long nau planti manmeri i save mauswara. Mauswara inap kamapim bel hevi, na em inap mekim na man i no slip gut, na bikpela samting moa, em inap nogutim man. . . .
“I hatwok long lusim pasin bilong mauswara, long wanem, em pasin bilong yumi man long toktok. Wanpela samting yumi ken mekim, em long bosim gut maus bilong yumi. Sampela gutpela rot bilong mekim olsem, em: 1. No ken skruim sampela tok moa. 2. No ken harim ol stori i save bagarapim bel bilong ol narapela. . . . Taim yu harim ol dispela tok, i olsem yu wanbel long ol tok ol i mekim. 3. Ol tok bilong bagarapim bel inap mekim yu i kamap man bilong giaman. 4. Na bikpela samting, em long tingting gut pastaim na bihain yu toktok! Askim yu yet: ‘Mi bai pilim olsem wanem sapos ol i mekim dispela tok long mi?’ ”
Meri i pinisim tok olsem: “Bihainim ol dispela fopela rot na ating yu inap kamap wanpela gutpela man.”
Em wanpela gutpela tok yumi olgeta i ken bihainim, i no bilong ol yangpela i stap long skul tasol! Nius Kirap! i save wok strong long kamapim long taim stret ol tok bilong ol kain kain samting i wok long kamap long nau. Sapos yu laik kisim dispela nius long olgeta taim, askim wanpela Witnes Bilong Jehova taim em i kam gen long haus bilong yu, o salim pas long atres i stret long yu long pes 5.