Mekim Wok Long Sno Bilong Antap

WANPELA MAN LONG SAUT AMERIKA I RAITIM DISPELA STORI BILONG KIRAP!

OL SAVEMAN i wok long Sili, ol i bin mekim gutpela wok long wanpela pasin bilong ol Arap bilong bipo long kisim wara bilong sno bilong antap. Nius Health InterAmerica i tok: “Inap planti handet yia long ples drai nating Oman, ol diwai oliv i bin kisim wara bilong sno bilong antap taim wara i sindaun long lip bilong ol na ran isi isi i go daun long ol liklik tang ol man i bin wokim long as bilong ol diwai.” Tasol ol saveman long Sili i no mekim wok long ol diwai oliv, nogat; ol i hangamapim ol traipela umben long ples drai nating long hap bilong ol maunten na long olgeta taim win bilong solwara i bringim sno bilong antap i kam na sno i karamapim dispela hap olgeta. Ol dispela traipela umben olsem umben ol man bilong pilai volibal i save hangamapim bilong pilai, ol i save bungim ol wan wan liklik hap wara bilong sno bilong antap. Isi isi ol dispela liklik hap wara i kapsait i go daun long wanpela liklik paip, na bihain wara i kamap long wanpela bikpela paip. Long rot bilong dispela bikpela paip, wara i save kamap long wanpela tang.

Sungungo, em wanpela liklik ples tru long ples drai nating long nambis long hap not bilong Sili. Long dispela ples, pasin bilong kisim wara bilong sno bilong antap i kamap gutpela. Wanpela lain bilong Kanada (International Development Research Centre) i save wokim wanpela nius (IDRC Reports) na dispela nius i tok, inap 14 yia i go pinis, ol manmeri bilong Sungungo ol i no gat wara bilong dring. Long olgeta de, ol trak i mas kisim 5,000 lita wara i kam long dispela ples, na long olgeta de wan wan famili i gat 3 i go inap 14 lita wara tasol bilong mekim wok long en. Tasol 75 umben ol saveman i bin pasim antap long ol maunten klostu long Sungungo i mekim gutpela wok long bungim wara, na nau dispela liklik ples i save kisim 11,000 lita wara​—⁠em 30 lita wara long olgeta de bilong wan wan man long Sungungo. Saveman Robert Schemenauer, em wanpela man bilong glasim sno bilong antap, em i tok, dispela pasin bilong kisim wara bilong sno bilong antap i bin helpim skin bilong ol man bilong Sungungo na ol i no sik tumas. “Olgeta i save kaikai kumu na prut long gaden bilong ol yet.”

Wara bilong sno bilong antap i gutpela wara bilong helpim skin na i no gat bikpela pe. Saveman Schemenauer i tok, ol i mas tromoi olsem 75,000 dola long ol umben samting, tasol bilong wokim banis bilong pasim wara em bai bikpela mani moa, olsem planti milion dola. Ol saveman i tok, planti ples drai nating long olgeta hap inap kisim wara long dispela rot bilong umben, tasol ol bikpela kampani samting i no laik bilip hariap long dispela narapela rot bilong kisim wara.

[Ol Piksa long pes 27]

Han kais: Ol umben antap long maunten i save bungim ol liklik hap wara bilong sno bilong antap

Daunbilo: Ol i sanap klostu long umben na kisim piksa

[Kredit Lain]

Ol poto bilong IDRC