Yu Ting Olgeta Lotu i Save Bringim Man Long God?

Planti milion manmeri i bilip olsem olgeta lotu i narapela narapela rot bilong i go long wanpela ples tasol. Ol tok ol lotu i skulim ol man long en, ol pasin bilong lotu, na ol god bilong ol i klostu wankain tasol. Tingim wanpela imis bilong ol Hindu, bilong yia 700 C.E. samting, i stap long Kerala, India.

Yumi kirap nogut long save, long planti lotu bilong bipo ol i bin lotuim ol bulmakau. Daiodorus Sikulus, em wanpela man Grik i save raitim ol stori bilong ol samting i kamap bipo na em i bin stap long yia 100 B.C.E. samting, em i tok, god bilong ol Amon, em Molek, em tu i olsem wanpela man, tasol em i gat het bilong bulmakau.

Bilong wanem planti samting bilong lotu i wankain long ol narapela narapela lotu long olgeta hap bilong graun? Olsem wanem? Ol dispela lotu i gat wanpela as tasol? Tru olgeta lotu i narapela narapela rot bilong i go long wanpela ples tasol? Na yu ting God i orait long olgeta dispela lotu?

Stori bilong as bilong ol bikpela lotu na ol i kamap bikpela olsem wanem, i stap insait long buk Mankind’s Search for God na dispela buk i bekim ol dispela askim. Sapos yu laik kisim dispela buk o yu laik bai wanpela Witnes i kam long haus bilong yu na toktok wantaim yu long tok Baibel i mekim long dispela samting, orait raitim pas long IBSA, Box 636, Boroko, NCD 111, Papua New Guinea, o lukim atres i stap long pes 5 i stret long yu.