Ol Kain Kain Wok Bilong Chitenge
WANPELA MAN LONG NAMIBIA I RAITIM DISPELA STORI BILONG KIRAP!
CHITENGE—yu save em i wanem samting? Sapos yu gat liklik hap taim, kam raun liklik long wanpela ples long Afrika, na lukim ol kain kain wok ol meri i save mekim long chitenge, long taim bilong wok na long taim bilong pilai.
Nem bilong ples mipela i go lukim em Rundu, long Namibia. Namba wan hap mipela i go raun long en em maket na planti man i go i kam na mekim wok long dispela hap. Pes bilong ol meri i lait na ol i toktok long pe bilong ol samting, na ol i wok long baim na salim ol samting, o ol i stori tasol. Tasol lukluk gut, na bai yu lukim olsem klostu olgeta meri i pasim wanpela kain klos, em i kain olsem laplap ol i kolim chitenge.
Ol i wokim chitenge long laplap koten na longpela bilong en i olsem tupela mita na braitpela bilong en i olsem wanpela mita hap, na i gat kain kain kala na stail. Sampela i gat piksa bilong ol animal, na sampela i gat piksa bilong ol manmeri o solwara na maunten samting.
Nau mipela i go lukim ol manmeri i stap long ples, na mipela i lukim ol haus ol i wokim long graun na kunai. Ol meri i wok strong long mekim wok bilong ol. Ol i klinim arere bilong haus o wokim paia bilong kukim kaikai bilong famili. Sampela i pasim chitenge tasol, na ol i pasim antap liklik long bros bilong ol. Taim ol meri i pasim bilas—olsem ol i pasim klos na sket—ol bai pasim chitenge tu, nogut sket i kamap doti taim ol i wokabaut long ol rot bilong ples i gat planti das.
Yu lukim dispela naispela yangpela meri? Em i pasim chitenge—em inap olsem tupela mita—na em i wokim olsem wanpela naispela bilas bilong het. Na lukim pasin bilong em long karim bebi bilong em. Em i pasim narapela chitenge na taitim long sol bilong em. Bebi bilong em i amamas taim mama i karim em long baksait bilong em. Sapos bebi i krai, taim mama i wokabaut yet em i ken pulim bebi i kam long bel bilong em na givim susu long em, o mekim em i stap isi.
Ating yu lukim tu olsem em i pasim mani bilong em long kona bilong laplap bilong em—em i gutpela paus bilong mani. Taim em i baim pinis ol samting, em i rausim chitenge long het na putim ol kaikai i go insait long en na pasim gut, na nau em i putim antap long het bilong em na karim i go long haus.
Taim em i kamap long haus, yu ken lukim ol narapela gutpela wok bilong dispela laplap. Long olgeta dua i gat wanpela chitenge i gat kala kala i hangamap i stap. Olsem yu ken lukim, insait long haus i no gat ol banis. Ol i taitim wanpela rop long hapsait bilong haus i go long narapela hapsait, na fopela chitenge i hangamap long en, na i makim rum bilong slip na rum bilong sindaun na stori.
Meri bilong lukautim mipela i luksave olsem paiawut i pinis. Paslain long em i go long bus bilong kisim paiawut, em i kisim wanpela chitenge moa i go. Taim em i kisim paiawut pinis, em i mekim wok long wanpela chitenge na pasim paiawut. Nau em i kisim narapela chitenge na tanim i kamap olsem strongpela ring, kain olsem raunpela donat samting, na putim antap long het bilong em. Dispela i olsem wanpela gutpela pilo bilong lukautim het bilong em taim em i karim planti paiawut antap long het na go bek long haus.
Taim kaikai i stap long paia, pren bilong mipela i laik go lukim famili i stap klostu long ol. Taim em i toktok i stap na wokim han, em i putim chitenge long graun olsem wanpela blanket, na putim bebi bilong em antap long en. Bebi i amamas na lap long mama, na mama i givim wanpela stik long em bilong pilai.
I no longtaim na pren bilong mipela i mas i go bek long haus bilong redim kaikai. Tasol skai i tudak na wantu ren i pundaun. Em i no wari long dispela, em i kisim bebi bilong em long wanpela han na karamapim chitenge long het bilong em. Nau chitenge i kamap olsem ambrela bilong ol, na em i go long haus long taim stret bilong redim kaikai.
Sket, klos, paus, samting bilong pulimapim kaikai long en, pilo, blanket, ambrela, laplap bilong karim pikinini, bilas bilong het—i gat planti wok long chitenge na em i kamapim klia gutpela tingting bilong dispela lain Afrika.
[Ol Piksa long pes 23]
Yu inap mekim planti narapela narapela wok long “chitenge”: pasim paiawut, laplap bilong karim bebi, wokim naispela bilas bilong het, blanket i gat planti kala