Wanpela Diwai i Save Singsing

WANPELA MAN LONG KENYA I RAITIM DISPELA STORI BILONG KIRAP!

LONG bikpela ples kunai long Afrika i gat wanpela diwai i sanap na planti taim diwai i save singsing. Dispela diwai em i bilong famili diwai akas na ol i kolim dispela diwai olsem diwai nil i save wisil. Bilong wanem ol i givim dispela nem long en? Long wanem, taim win i strong na meknaisim ol han bilong en, pairap bilong en i olsem diwai i wisil.

Naispela pairap olsem musik i kamap taim ol narapela kain longpela nil bilong diwai i meknais long win. Narapela samting tu i mekim musik wantaim ol nil bilong diwai, em ol liklik hul long ol buk i stap long sampela hap bilong diwai. Pairap i kamap long ol dispela hul i olsem pairap i save kamap long botol i no gat wanpela samting insait long en na yumi winim maus bilong en. Ol dispela samting i kamapim pairap olsem musik, em wok bilong ol anis. Ol anis i go insait long ol buk na rausim ol pipia long en bilong wokim haus bilong ol, na ol i wokim liklik hul bilong go insait na kam ausait long haus bilong ol. Ol buk na hul i no wankain, sampela i bikpela na sampela i liklik, olsem na pairap i save kamap long en i narapela narapela kain. Ol dispela kain pairap i mekim na diwai nil i save wisil em i narapela kain stret na i naispela tru.

Dispela diwai i kirapim yumi long tingim tok bilong man bilong raitim Song, em i tok “olgeta diwai bilong bikbus bai mekim song bilong amamas” long Jehova. (Song 96:​12, 13) Tru tumas, taim win i winim ol nil na buk bilong diwai, ol dispela samting i kamapim pairap i olsem naispela singsing tru bilong Afrika.