“Mi Mas Bilip Long God”

Ol i bin lusim dispela pas long wanpela Haus Kingdom bilong ol Witnes Bilong Jehova long Edmenten, Albeta, long Kanada.

“Yes Man Bilong Autim Tok:

“Mi raitim dispela pas bilong tok tenkyu long wanpela man i bin mekim bikpela samting olsem mirakel long i stap bilong mi, tasol ating em yet i no save long dispela samting.

“Inap tupela wik i go pinis, mi na man bilong mi i bin tok pait nogut tru. Taim mi tok, ‘Dispela hevi i bikpela tru na mi no save bai mi inap winim o nogat,’ long dispela taim stret belo bilong dua i krai. Wanpela Witnes Bilong Jehova i sanap long dua, na mi no gat taim long hait.

“Taim mi opim dua, mi no inap putim tingting bilong mi long tok em i mekim. Tasol mi inap tingim tok ‘pikinini’ na ‘famili.’ Dispela man i kamautim buk Rot Bilong Famili i Ken Stap Amamas. Taim mi lukim het-tok bilong en, mi kirap long krai na mi no inap pinisim krai. Em i lukluk long mi na tok sori, na em i givim buk long mi na em i go.

“Dispela mirakel em i wanem samting? Nau mi kisim save olsem taim mi no save long samting mi mas mekim, mi no ken wari, long wanem, God i save. Mi mas bilip long God. Em i bin salim man bilong autim tok i kam. Tenkyu tru.”

Dispela buk Rot Bilong Famili i Ken Stap Amamas inap helpim olgeta long famili. Sampela gutpela sapta bilong skulim yumi i olsem: “Lukautim Famili na Bai Pasin Nogut i No Ken Bagarapim Ol,” “Helpim Famili Long i Stap Bel Isi Wantaim,” na “Yu Inap Winim Ol Hevi i Save Bagarapim Famili.”

Bilong kisim wanpela buk, raitim nem na atres long dispela hap pepa na salim i go long atres i stap long en o long wanpela atres i stret long yu em i stap long pes 5 bilong dispela nius. Bai yu kisim ol gutpela tok inap helpim yu long stretim ol hevi na long mekim i stap bilong famili i kamap gutpela tru, olsem Man bilong wokim yumi i laikim.

□ Salim wanpela buk Rot Bilong Famili i Ken Stap Amamas long mi.

□ Plis kam lukim mi, mi laik stadi long Baibel, no gat pe.