Sampela Man Bilong Nau i Sindaun Long Ol Hul Bilong Maunten
WANPELA MAN LONG LESOTO I RAITIM DISPELA STORI BILONG KIRAP!
OLSEM WANEM? Long taim bilong yumi i gat ol man i save sindaun long ol hul bilong maunten? Mipela painim sampela long Lesoto, long ol maunten long hap saut bilong Afrika. Ha Komi em nem bilong dispela ples na em i stap longwe olsem 60 kilomita long Maseru, em biktaun bilong Lesoto, long hap ol bikpela maunten tru bilong Maluti i kirap long en. Long taim bilong san, ol retpela plaua i save pulap long olgeta hap bilong maunten. Em ol plaua ol i save kolim olsem red-hot pokers, kala bilong ol dispela naispela plaua i lait gut tru namel long ol grinpela gras samting.
Long dispela hap ol famili i bihainim wankain pasin olsem ol lain bilong planti handet yia i go pinis. Ol i save wokim ol haus bilong ol insait long ol hul bilong maunten. Bilong banisim maus bilong hul, ol i mekim wok long han bilong ol diwai na ol narapela samting olsem pitpit. Bilong pasim kol ol i save putim graun malumalum wantaim pekpek bilong bulmakau long dispela banis. Sampela taim kol bilong Lesoto i mekim na ol wara i kamap olsem ais. Long plua i stap insait ol i wokim wanpela hap ol i kolim ifo, dispela nem i makim “ples bilong wokim paia,” na dispela paia tu i save mekim ples i hat liklik long taim bilong kol.
Banis ston bilong dispela hul i stap olsem rup bilong haus, na banis bilong baksait, na ol banis i stap arere. Wanpela taim long olgeta yia ol i save tanim graun malumalum wantaim pekpek bilong bulmakau na pasim long banis na rup i stap insait. Dispela i kamapim kala insait long haus na ol banis insait i stap gut. Skin bilong bulmakau i bilasim haus insait na i stap olsem matres bilong ol long slip.
Ol man bilong ol kantri i stap long hap bilong Wes, taim ol i raun long dispela hap ol bai pilim olsem i stap bilong ol man long Ha Komi i gutpela na i narapela kain tru. Klos bilong ol lain i stap long dispela hap em ol laplap i gat kala kala na ol hat ol i save wokim long gras. Planti taim yu inap lukim ol manki i stap lek nating na lukautim ol sipsip bilong ol. Yu inap lukim ol man bilong dispela ples i wok long ol bikpela gaden kon bilong ol o ol i amamas long bung na toktok wantaim ol narapela man.
Wan wan taim ol lain i stap long dispela hap ol inap lukim ol masin samting bilong nau. Ol yangpela na ol lapun long ples i kisim amamas long lukim ol liklik balus o ol ka i gat 4-wil-draiv i save kam sampela taim bilong lusim ol lain i kam raun long dispela hap. Ol lain i stap long dispela hap i save kukim kaikai ausait, ol i wokim paia aninit long wanpela sospen ain i sanap long 3-pela lek bilong en. I no gat planti paiawut, olsem na ol i save wokim paia long pekpek bilong bulmakau i drai pinis, na pitpit, na sampela han bilong diwai. Planti haus i gat wanpela masin bilong bipo bilong wilwilim kon, na wanpela stik bilong tanim kon taim ol i wok long kukim.
Ol man i save olsem Lesoto i gat ol piksa bipo ol lain Busman i bin wokim insait long sampela hul bilong maunten na ausait long sampela ston. Ol Busman i bin stap long ol hul bilong maunten long Ha Komi paslain long ol narapela. Ol piksa bilong ol i kamapim kain kain samting ol i bin mekim, olsem raun long bot na kisim pis long umben, na pasin bilong ol long pasim ol samting ol i bin sapim olsem pes bilong ol animal taim ol i mekim danis. I gat ol piksa bilong wanpela kain monki ol i kolim babun, na laion, na hipopotamus, na wanpela kain dia ol i kolim ilan, bikpela bilong em i winim olgeta narapela dia. Planti piksa long ol hul long Ha Komi i no stap moa. Sampela tasol i stap bilong kirapim yumi long tingim pasin bilong ol Busman long wokim piksa.
Sampela lain bilong ol Witnes Bilong Jehova i save mekim wok bilong ol long autim tok long wanpela hap i no longwe tumas long Ha Komi. Sampela taim ol i save go lukim ol lain i wokim haus bilong ol long ol hul bilong maunten, em ol lain i gat nem long mekim gut long ol man i save kam lukim ol. Ol Witnes i kam na planti taim ol lain bilong haus i save givim sampela sup long ol, ol i kolim motoho. Planti lain bilong Ha Komi ol i amamas long kisim sampela nius bilong Baibel. Na bilong tok tenkyu long dispela samting ol i save givim sampela kaikai bilong gaden, kiau, na sampela narapela samting bilong helpim wok bilong ol Witnes long skulim ol man long Baibel.
Ol dispela lain bilong nau i sindaun long ol hul bilong maunten ol i save pilim tru ol tok bilong Baibel, na ol i amamas long givim planti askim long pasin bilong stap laip, na i dai, na ol bilip bilong ol tumbuna bilong ol. Ol Witnes i save wok strong long dispela hap, na dispela i mekim na ol i bin kirapim sampela Baibel-stadi. Long dispela rot, pikinini wit bilong tok i tru i kru na kamap long bel bilong ol dispela lain i save bihainim pasin daun.—Matyu 13:8.
[Mep long pes 14]
(Bilong save ol dispela rait i stap we long pes, lukim buk o magasin)
HA KOMI