Helpim Ol Pikinini Long Kamap Gutpela—Yu Inap Mekim Olsem Wanem?

Wanpela ripot bilong nius The Gazette bilong Montriol, Kanada, i tok: “Ol pikinini i lainim pasin bilong amamas long ol yet na bosim skin bilong ol taim papamama i laikim ol na wok long stretim ol.” Wanem samting i insait long dispela wok? Constance Lalinec em i wanpela savemeri bilong stretim tingting bilong man long Montriol, em i tok, em i bikpela samting long makim klia ol samting pikinini i ken mekim na i no ken mekim.

Lalinec i save wok wantaim ol pikinini na ol famili, em i tok tu olsem, “taim yumi pasim ol pikinini long karim ol hevi em pasin bikhet bilong ol yet i kamapim, yumi pasim ol tu long lainim planti samting.” Pasin bilong larim ol tasol long mekim ol samting long laik bilong ol yet inap mekim na pikinini i no kamap gutpela.

Inap longtaim pinis ol gutpela tok bilong Baibel long wok bilong mekim bikpela long ol pikinini i kamapim klia olsem tok bilong en i stret tru. Em i tok: “Taim yupela i tok Yes, yupela i mas truim dispela tok Yes, na taim yupela i tok Nogat, yupela i mas truim dispela tok Nogat.” (Matyu 5:​37, NW ) Taim papamama i putim pinis sampela gutpela lo na ol pikinini i save gut long en, orait papamama i mas strong long ol i mas bihainim ol dispela lo long olgeta taim. Ol samting yupela ol papamama i mekim i mas strongim ol tok bilong yupela. Dispela bai kamapim klia long ol pikinini olsem i gat lo bilong papamama na ol i mas bihainim​—⁠na kaikai ol man i planim “dispela kain kaikai tasol” bai ol i kamautim. (Galesia 6:7; Rom 2:⁠6) Ol papamama i laik tru bai pasin bilong ol long sori long ol pikinini na stretim gut ol i helpim ol pikinini long lain long bihainim ol lo, na long ol i no ken les kwik, na ol i wet pastaim na bihain inapim laik bilong ol. Dispela bai helpim ol long kisim ol gutpela pasin ol i mas i gat bilong kamap gutpela man bilong tingim gut ol wok samting em i mas mekim.

Planti gutpela tok moa bilong God bilong helpim ol papamama long stretim gut ol pikinini long pasin sori i stap long buk Rot Bilong Famili i Ken Stap Amamas. Yu ken kisim dispela buk i gat 192 pes long en sapos yu raitim nem na atres bilong yu long hap daunbilo na salim long atres i stap long en o long atres i stret long yu em i stap long pes 5 bilong dispela nius.

◻ Salim wanpela buk Rot Bilong Famili i Ken Stap Amamas long mi.

◻ Plis kam lukim mi, mi laik stadi long Baibel, no gat pe.