Pasin Bilong Mekim Nogut Long Man—Em Bai Pinis Long Bihain?
Nius Kirap! bilong Mas 8, 2000, i bin stori long hevi bilong wok kalabus, em wanpela hevi i stap yet long sampela hap bilong graun, na ol i bin givim wanpela bilong ol dispela nius long Livia Turco, em wanpela minista bilong gavman long Itali, em i gat wok long helpim ol lain long sindaun gut wantaim. Long wanpela pas em i bin salim long brens-ofis bilong ol Witnes Bilong Jehova long Itali, em i tok olsem:
“Ol kain kain wok kalabus long nau, em ol i save givim bikpela hevi moa long ol meri na ol pikinini, dispela i kamapim olsem planti milion manmeri i kisim yet bikpela hevi long rot bilong ol man i mekim nogut long ol.” Bilong pinisim tok bilong em, em i tok: “Olgeta man i tokaut long dispela hevi, ol i mekim wanpela gutpela samting tru, na taim dispela tok bilong ol i kamap long wanpela nius [Kirap!] em planti man moa i save kaunim, em bai helpim planti man moa long kisim save long dispela hevi.”
Ol Witnes i save tilim inap olsem 20 milion Kirap! long 82 tok ples na dispela i helpim planti milion man long kisim save long as bilong ol hevi bilong nau, na tu ol i kisim save long tok bilong Baibel long rot bilong pinisim ol dispela hevi.
Tasol wanpela askim i stap yet olsem, Sapos tru i gat wanpela God i stap, orait bilong wanem em i larim ol man i no gat asua ol i kisim bikpela pen na hevi? Planti man i tingting olsem, ‘Olsem wanem mi inap laikim Man bilong wokim yumi, em gutpela tingting na save bilong em i kamap ples klia long ol gutpela samting em i bin wokim, tasol em i no sori long ol manmeri long nau?’ Bekim bilong ol kain askim olsem i stap long liklik buk, Tru God i Save Tingim Yumi? Bilong kisim wanpela liklik buk, raitim nem na atres long dispela hap daunbilo na salim i go long atres i stap long en o long wanpela atres i stret long yu em i stap long pes 5 bilong dispela nius.
□ Salim wanpela liklik buk Tru God i Save Tingim Yumi? long mi.
□ Plis kam lukim mi, mi laik stadi long Baibel, no gat pe.