As na Ol Man i Lusim Pinis Stretpela Pasin

LONG mun Oktoba, 1999, wanpela man bilong raitim ol nius long Loja, Ekwado, em i tokaut olsem em i amamas long wok bilong ol Witnes Bilong Jehova long autim tok. Sampela samting em i tokaut long en em olsem:

“Wanpela samting nogut tru i save givim hevi long ol man em, ol man i lusim pinis stretpela pasin . . . I luk olsem ol manmeri i lusim tingting long inapim ol Tenpela Lo na ol i sakim maus bilong bel bilong ol, na dispela samting i pasim ol long pilim tingting bilong ol narapela. Long olgeta hap na long olgeta taim yumi save harim tok long pasin bilong ol man long bel nogut long narapela, pasin pait, maketim ol drak, birua na bagarapim ol man, na ol i no daun long ol narapela olsem ol i gat biknem. . . .

“Ol Witnes Bilong Jehova i save bihainim pasin isi na gutpela pasin taim ol i mekim wok bilong ol, na ol i no save mekim ol samting bilong pulim ai bilong ol man. Ol i save go lukim ol man i stap long hap bilong ol na lusim tupela gutpela nius, em Wastaua na Kirap!, em tupela nius i gat ol gutpela stori tru long en. Kirap! i stori long planti samting ol man i gat laik long save long en, em i skelim ol wok bilong saiens na i stori long sindaun bilong ol man bilong kain kain lain. Ol i save raitim ol dispela stori long pasin i klia na i stret tru.”

Ol pasin nogut long nau i stap ples klia tru, tasol olsem tok i stap long pes 4 bilong dispela nius i kamapim​—⁠long hap “Wok Bilong Kirap!”​—⁠Kirap! “i kamapim long ples klia as bilong ol samting nau i kamap long graun.” Liklik buk Tru God i Save Tingim Yumi? i tokaut long ol hevi ol man i bin karim, na em i mekim sampela samting moa. Em i kamapim ol as na ol man i lusim pinis stretpela pasin na ol samting nogut i kamap long en. Na bikpela samting moa, em i stori olsem liklik taim na ol gutpela samting bai kamap.

Yu ken kisim dispela liklik buk i gat 32 pes long en, sapos yu raitim nem na atres long hap daunbilo na salim i kam long atres i stap long en o long atres i stret long yu em i stap long pes 5 bilong dispela nius.

□ Salim wanpela liklik buk Tru God i Save Tingim Yumi? long mi.

□ Plis kam lukim mi, mi laik stadi long Baibel, no gat pe.