“Mi No Inap Tru Long Lusim Ol Nius Bilong Yupela”
I no longtaim i go pinis na brens-ofis bilong Sosaiti Was Taua long Jemani i kisim wanpela pas i tok olsem:
“Mi mas tokaut olsem mi no inap tru long lusim ol nius bilong yupela. Wankain samting olsem i save kamap long olgeta yia. Paslain liklik long mi go long malolo, mi pasim tok olsem bai mi larim tupela laspela nius bilong kaunim long nambis. Mi pasim strong dispela tok long bel!
“Tasol taim mi kisim ol dispela nius, wanpela hevi i save kamap. Mi ting olsem, bai mi lukluk tasol long hap i gat lista bilong ol tok i stap insait. Man! I gat stori bilong wanpela man. Ating bai mi kaunim dispela stori tasol. Tasol, narapela stori i kamap bihain long en, dispela tu i kirapim tru tingting bilong mi. Orait, em inap nau! Mi mas larim ol dispela nius i stap bilong kaunim long taim mi go malolo. Maski, bai mi kaunim wanpela stori moa. Na long olgeta taim ol stori bilong ‘Sampela Tok i Kam Long Olgeta Hap’ ol i save kamapim ol gutpela save tru! Ating nau yu inap save pinis wanem samting i kamap, taim mi go kamap long nambis, i no gat wanpela stori moa i stap bilong kaunim.”
Ol i save prinim 20,300,000 bilong wan wan nius Kirap! long 82 tok ples, na dispela i kamapim klia olsem planti manmeri i save laikim dispela nius. Ol man i kaunim dispela nius ol i save amamas long ol stori bilong ol gutpela samting bai kamap bihain. “Wok Bilong Kirap!,” dispela tok i save stap long olgeta nius, em i tokaut olsem dispela nius “i save kirapim ol man long bilip tru long tok promis bilong God, em i tok long kamapim gutaim na bel isi.”
Tasol planti ol i gat askim olsem: ‘Bilong wanem God i larim pen na hevi i stap longpela taim?’ Bekim bilong dispela askim i stap long liklik buk Tru God i Save Tingim Yumi? Yu ken kisim wanpela liklik buk sapos yu raitim nem na atres bilong yu long hap daunbilo na salim i go long atres i stap long en o long wanpela atres i stret long yu em i stap long pes 5 bilong dispela nius.
□ Salim wanpela liklik buk Tru God i Save Tingim Yumi? long mi.
□ Plis kam lukim mi, mi laik stadi long Baibel, no gat pe.