“Plis Helpim Mi! Yupela Tasol Inap Helpim Mi”
EM TOK WANPELA DOKTA bilong wanpela yunivesiti (Kaunas Medical University) long Lituenia em i raitim long pinis bilong pas em i salim long ofis bilong ol Witnes Bilong Jehova long dispela kantri. Dokta i tok:
“Long ples wok mi kirap ritim buk Sampela Askim Bilong Ol Yangpela—Ol Gutpela Bekim. Mi bin tingting pinis long mekim wok long sampela tok bilong en long ol stori mi save raitim, tasol sampela samting i kamap na buk i lus. Ating wanpela man i kisim. Mi tingting planti long dispela, long wanem, samting i dia tumas i lus. Plis salim wanpela bilong dispela buk i kam long mi.
“Mi mas kisim dispela buk, long wanem, mi save go long ol skul na mekim wok bilong helpim ol yangpela, na dispela buk i helpim mi long bekim planti askim bilong ol. Sapos mi kisim gen wanpela bilong dispela buk, bai mi lusim i stap long haus na lukautim gut. Ol tok i stap long dispela buk i gutpela tru, olsem na ating long dispela as wanpela i bin kisim. Long dispela taim nogut, em i bikpela samting long yumi mas i gat rot bilong kisim strong. Plis helpim mi! Yupela tasol inap helpim mi.”
Buk Askim Bilong Ol Yangpela i skelim planti askim ol yangpela i save tingting long en. Olsem: “Mi Ken Mekim Wanem na Bai Papamama i No Pasim Mi Tumas?,” “Gutpela Sapos Mi Lusim Papamama o Nogat?,” “Olsem Wanem Mi Inap Painim Ol Gutpela Pren?,” “Bai Mi Mekim Wanem Kain Wok?,” “Olsem Wanem Long Mekim Maritpasin Taim Mi No Marit Yet?,” na “Olsem Wanem Mi Inap Save Mi Givim Bel Tru Long Em o Nogat?” Em sampela sapta tasol bilong dispela buk, i gat planti moa. Yu ken kisim wanpela buk, sapos yu raitim nem na atres long hap daunbilo na salim i kam long atres i stap long en o long atres i stret long yu em i stap long pes 5 bilong dispela nius.
□ Salim wanpela buk long mi, nem bilong en Sampela Askim Bilong Ol Yangpela—Ol Gutpela Bekim.
□ Plis kam lukim mi, mi laik stadi long Baibel, no gat pe.