“Wet Long Paradais i Kamap”

Long yia i go pinis, ol i bin kisim wanpela pas long brens bilong ol Witnes Bilong Jehova long Papua Niugini, na pas i kam long wanpela man i save ritim Kirap! long tok Inglis, em i stap long Lae, Morobe Provins. Dispela man i tok:

‘Mi ken tok olsem mi bin bihainim gutpela tingting taim mi ritim nius Kirap! em oganaisesen bilong yupela i wokim, em long taim mi bin stap long Port Moresby long 5-pela yia i go pinis. Kirap long 1997 i kam inap long nau mi bin ritim olgeta wan wan nius. Haus bilong mi i pulap long nius Kirap!

“Mi bin lainim planti samting. Mi lainim ol nupela tok, ol lo bilong kolim stret tok, na mi kisim kain kain save, na save bilong mi long Man bilong wokim olgeta samting i go bikpela tru. Nau mi save isi moa long ol man na strong moa long tingim ol narapela, na strong moa long skelim gut ol samting, na mi kisim pasin bilong tingim tru ol diwai na plaua samting na ol animal. Mi laik kirapim planti man long ritim Kirap! na ol narapela buk na nius bilong yupela.”

Bilong pinisim tok em i tok: “Mi bilip olsem sapos olgeta man long graun i kamap Witnes Bilong Jehova, Paradais yumi wet long en bai kamap tru tru insait long wanpela nait tasol. Mekim yet gutpela wok bilong yupela.”

Ol buk na nius bilong ol Witnes Bilong Jehova i stori long Baibel i tok promis olsem i no longtaim na Kingdom bilong God bai kamapim nupela taim i olsem senis bilong dispela taim nau yumi stap long en. Buk Save i Bringim Man Long Laip Oltaim i kamapim olsem Kingdom tasol bai stretim ol hevi bilong man.

Yu inap kisim dispela buk i gat 192 pes long en na skelim ol tok i stap insait long en. Raitim nem na atres bilong yu long hap ol i makim na salim long atres i stap long en o long atres i stret long yu i stap long pes 5 bilong dispela nius.

□ Salim wanpela buk Save i Bringim Man Long Laip Oltaim long mi.

□ Plis kam lukim mi, mi laik stadi long Baibel, no gat pe.