Ol Rot Bilong Helpim Marit Long Wok Gut

Niuspepa La Presse, i tok: “Mekim pasin giaman liklik tasol, em rot bilong helpim man na meri long laikim narapela narapela.” Dispela niuspepa bilong Kanada i kamapim wanpela ripot i tok olsem pasin giaman i gutpela samting. Ol i kamapim dispela ripot long nius Journal of Social and Personal Relationships. Profesa Tim Cole, bilong De Paul Yunivesiti, long Chicago, Amerika, i tok: ‘Taim yumi giaman liklik, yumi inap lukautim na kisim ol gutpela samting long pasin bilong man na meri long laikim narapela narapela na yumi no bagarapim dispela pasin.’

Tasol olsem wanem? Tru tru pasin giaman em wanpela rot bilong helpim marit long wok gut? Baibel i tokim ol Kristen: “Yupela i mas lusim pasin bilong giaman. Yupela olgeta i mas mekim tok tru tasol long ol arapela.” (Efesus 4:25) Olsem wanem? Dispela tok i helpim ol marit? Taim ol i askim, Wanem wanpela nambawan as na ol marit i save bruk? Wanpela man bilong stretim ol samting bilong katim marit i tok: “Tupela i no inap tok tru long narapela narapela, kamapim ol tingting i stap long bel bilong ol, na mekim pasin long narapela olsem gutpela pren.”

Orait, wanem rot tru bilong kamapim amamas insait long marit? Long buk Rot Bilong Famili i Ken Stap Amamas, het-tok bilong sapta 3 em “Tupela Rot Bilong Helpim Marit Long Stap Longtaim.” Em i skelim tupela bikpela samting i mekim na tupela marit inap stap amamas wantaim, na ol i kisim planti gutpela blesing. Yu inap kisim dispela buk sapos yu raitim nem na atres bilong yu long hap ol i makim na salim long atres i stap long en o long atres i stret long yu i stap long pes 5 bilong dispela nius.

□ Mi laik kisim wanpela buk Rot Bilong Famili i Ken Stap Amamas.

□ Plis kam lukim mi, mi laik stadi long Baibel, no gat pe.