Helpim Bilong Winim Bel Hevi Bilong Ol Yangpela
TISA i askim ol sumatin i kisim Inglis kos long Meksiko long redim wanpela tok long samting ol yet i gat laik long stori long en. Maritza i tok: “Inap sampela hap taim mi bin pilim bikpela bel hevi na stori bilong Awake! bilong Septemba 8, 2001, nem bilong en ‘Help For Depressed Teens,’ i bin helpim mi. Olsem na mi mekim wok long dispela stori na redim tok bilong mi, na tisa i makim tok bilong mi olsem nambawan tru. Bihain mi wokim kopi bilong dispela stori na givim long ol sumatin na ol tisa.”
Tupela yia bihain, taim Maritza i mekim wok autim tok, em i bungim wanpela sumatin husat i bin kisim dispela wankain Inglis kos. Maritza i kirap nogut taim dispela sumatin i soim em kopi bilong dispela stori long Awake! i bin toktok long bel hevi bilong ol yangpela. Man! I luk olsem tisa i laikim tru dispela stori, olsem na em i wokim kopi bilong dispela stori bilong Awake! na givim long olgeta wan wan sumatin bilong em!
Yu ken kisim sampela save moa long bel hevi bilong ol yangpela long buk Sampela Askim Bilong Ol Yangpela—Ol Gutpela Bekim. Sampela bilong ol sapta em, “Olsem Wanem na Mi No Amamas Long Mi Yet?,” “Bilong Wanem Mi Save Bel Hevi?,” na “Mi No Gat Poroman na Olsem Wanem Mi Inap Daunim Dispela Bel Hevi Bilong Mi?” Bilong kisim dispela buk, yu ken raitim nem bilong yu long hap hia na salim long atres i stap long dispela hap o i stap long pes 5 bilong dispela nius.
□ Salim wanpela buk long mi.
□ Plis kam lukim mi, mi laik stadi long Baibel, no gat pe.