Em Wantaim Ol Pikinini i Kisim Save Long Wankain Taim
● Wanpela mama husat i gat 30 krismas samting na i stap long Kentucky, Amerika, wantaim man bilong em na 3-pela pikinini bilong ol, em i tok: “Ol buk na nius em ol Witnes Bilong Jehova i bin wokim, ol dispela buk i helpim mi na famili bilong mi.” Em i tok: “Feiveret buk bilong mi long helpim ol pikinini em Baibel Stori Buk Bilong Mi.” Na em i tok moa olsem: “Mi tu mi kisim save long wankain taim olsem ol pikinini bilong mi.”
Dispela buk i gat planti naispela piksa na i kamapim ol stori bilong Baibel, kirap long ol samting i kamap pastaim na i kam. Olsem: Hap 2 i gat ol stori olsem, “King Nogut i Bosim Isip,” “Moses i No Bagarap,” “Bilong Wanem Moses i Ranawe?,” “Moses na Aron i Go Lukim Fero,” “Tenpela Hevi,” na “Ol i Brukim Solwara Retsi.”
Long hap 6 bilong dispela buk i gat het tok olsem, “Taim Mama i Karim Jisas Inap Long Taim Jisas i Dai.” Dispela hap i kamapim ol stori i tokaut long laip bilong Jisas kirap long taim mama i karim em i go inap long taim em i dai. Sampela stori em olsem, “Mama i Karim Jisas” na “Sta i Soim Rot Long Ol.” Long stori “Sta i Soim Rot Long Ol,” ol saveman bilong sta ol i “go insait long haus” na lukim Jisas; ol i no go long haus bulmakau we Jisas i bin bon long en. Taim ol i go insait long haus, “ol i lukim pikinini wantaim mama bilong en Maria.” God i toksave long ol i no ken go bek long Herot husat i wok long painim rot bilong kilim i dai Jisas. Olsem wanem dispela i helpim yumi long save husat i as bilong dispela sta?—Matyu 2:1, 11, 12.
Yu tu bai kisim save long wankain taim olsem ol pikinini bilong yu taim yu ritim Baibel Stori Buk Bilong Mi. Dispela buk i gat 116 stori—em ol stori bilong ol manmeri na ol samting i bin kamap bipo em Baibel i stori long en. Bilong kisim dispela buk, yu ken raitim nem bilong yu long hap hia na salim long atres i stap long pes 5 bilong dispela nius.
□ Salim wanpela buk Baibel Stori Buk Bilong Mi long mi.
□ Plis kam lukim mi, mi laik stadi long Baibel, no gat pe.