Taim Mi Marit, Mi Ken Ekspektim Wanem Samting? Hap 1

ATING yu luksave pinis olsem dispela tok i stap antap i bilong wanpela singel meri, na tok long han kais i bilong wanpela husat i marit pinis. Ating wanpela samting yu no luksave long en em olsem, dispela 2-pela tok wantaim i bilong wanpela meri tasol.

Wanem hevi i kamap? Sapos yu tingting long marit bihain, yu inap mekim wanem na bai marit bilong yu i no ken pulap long ol hevi?

Samting tru: Bilong marit i ken stap amamas, yu mas i gat stretpela tingting long samting yu ekspektim.

Dispela atikol na neks atikol bilong “Ol Yangpela i Laik Save,” i stap long dispela nius Kirap! bai helpim yu long kisim stretpela tingting long ol samting yu ekspektim.

Yu mas i gat wanem stretpela tingting long samting yu ekspektim taim yu marit? Yu ken:

1. Ekspektim gutpela samting

2. Ekspektim sampela hatwok

3. Ekspektim ol samting yu no ting bai kamap

Yumi ken skelim gut olgeta wan wan bilong ol dispela samting.

EKSPEKTIM GUTPELA SAMTING

Baibel i kirapim yumi long kisim stretpela tingting long marit. (Sindaun 18:22) Em hia sampela gutpela samting yu ken ekspektim.

Pasin pren. Baibel i tok, taim God i wokim pinis namba 1 man Adam, em i tok: “I no gutpela long dispela man i stap wanpis,” na bihain long dispela em i wokim Iv olsem poroman bilong Adam. (Stat 2:18) Em i wokim ol na ol i gat narapela narapela pasin, na maski i olsem, ol inap wok gut wantaim. Olsem na man marit na meri marit inap stap gutpela pren tru bilong narapela narapela.—Sindaun 5:18.

Wok wantaim. Baibel i tok: “I no gutpela long man i stap wanpis. Sapos tupela man i stap wantaim, em i gutpela. Sapos tupela man i poroman long wok, orait bai wok bilong tupela i kamap gutpela moa.” (Saveman 4:9) Dispela tok i stret long ol marit. Brenda,a em wanpela yangpela meri em nau tasol em i marit, em i tok: “Bikpela samting em long wok bung wantaim na mekim pasin daun na sampela taim redi long bihainim tingting bilong narapela.”

Pas wantaim. Baibel i tok: “Maritman i mas givim long meri bilong en ol samting i stret meri i kisim. Na maritmeri i mas mekim wankain pasin long man bilong en.” (1 Korin 7:3) Taim yu marit, yu inap amamas long mekim maritpasin wantaim poroman marit na yu i no tingting planti na bel hevi wankain olsem ol narapela em ol i mekim maritpasin paslain long ol i marit.—Sindaun 7:22, 23; 1 Korin 7:8, 9.

Bikpela samting: Marit em presen i kam long God. (Jems 1:17) Taim yu bihainim ol stiatok bilong God, marit bilong yu bai i gat amamas long en.

Tingim dispela: Olsem wanem? Yu gat tingting kranki long marit, long wanem, ating yu lukim ol hevi insait long marit long famili bilong yu yet? Sapos olsem, wanem sampela gutpela eksampel em yu ken lukim na bihainim?

EKSPEKTIM OL HATWOK

Baibel i kamapim stretpela tingting long sait bilong marit. (1 Korin 7:28) Em hia sampela hatwok em yu ken ekspektim.

Tok pait. Olgeta man i narapela narapela, tasol samting i wankain em olsem olgeta i gat sin. (Rom 3:23) Olsem na maski i luk olsem man marit na meri marit i wok gut wantaim, sampela taim ol bai i no wanbel. Sampela taim ol inap kolim ol tok i no gutpela na bihain ol bai rigret long en. Baibel i tok: “Sapos man i no popaia long tok em i mekim, orait dispela man i gutpela olgeta.” (Jems 3:2) Taim ol hevi i kamap, ol gutpela marit i no save larim tasol, nogat, ol i lain long toktok gut wantaim na stretim ol hevi.

Bel hevi. Wanpela yangpela meri, Karen, em i tok: “Long nau, planti muvi na TV program i soim ol piksa we meri i painim wanpela man em i pilim olsem em i rait man stret long em na ol i stap amamas wantaim i go inap long olgeta taim bihain.” Taim man na meri i marit, na marit bilong ol i no kamap wankain olsem ol i bin ting, orait tupela wantaim inap bel hevi. Em tru olsem, bihain long ol i marit ol bai luksave long sampela pasin kranki bilong poroman marit. Bikpela samting long tingim em olsem man i gat pasin laikim tru em bai “sanap strong long olgeta hevi i kamap long em,” na dispela i makim tu bel hevi.—1 Korin 13:4, 7.

Tingting planti. Baibel i tok olsem ol lain i marit ol “i save tingim ol samting bilong graun.” (1 Korin 7:33, 34) Em nomol na i stret tu long tingim ol dispela samting. Olsem, yu inap pilim olsem i hatwok long kisim mani bilong baim ol samting yu nidim. Ating tupela poroman marit i mas mekim wok mani na bai ol i gat mani bilong baim kaikai, klos, na haus. Tasol marit inap kamap gut sapos man na meri i wok bung wantaim long lukautim famili.—1 Timoti 5:8.

Bikpela samting: Taim yu gat boipren o gelpren, dispela em isi kain olsem yu flaim wanpela kait, tasol taim yu marit, yu mas mekim bikpela wok moa kain olsem yu flaim wanpela balus. Yu mas kisim sampela save moa na wok strong moa long karim ol hevi—tasol yu inap winim ol hevi.

Tingim dispela: Long nau, taim hevi i kamap namel long yu na papamama na ol bratasusa bilong yu, yu save stretim dispela hevi olsem wanem? Taim yu bel hevi, yu save holim yet stretpela tingting? Yu save mekim wanem bilong daunim pasin bilong tingting planti?