Visitim Brasil

BIPO tru ol man bilong painim abus na ol man bilong wok gaden i bin sindaun long Brasil. Ol man Potugal, em ol i save raun long planti narapela hap i bringim Misin Katolik i kam, na bihain ol i wokim planti haus lotu na sampela em ol i bilasim long diwai kaving em ol i karamapim long lip gol.

Namel long yia 1550 na 1850 samting, ol sip bilong karim ol sleiv i karim olsem 4 milion lain Afrika i go long Brasil long mekim wok long ol fam. Ol Afrika i bringim tu ol kastam na bilip bilong ol i kam, na bihain dispela i kamap olsem lotu bilong ol Afrika bilong Brasil, em lotu makumba na kandombla. Na tu, ol lain bilong Brasil i kisim pasin bilong ol Afrika long pilaim musik, danis, na kukim kaikai samting.

Feijoada em kaikai tru bilong ol Brasil, na dispela stail bilong redim kaikai i kam long Potugal, we ol i miksim mit wantaim ol blakpela bin, na ol i save kaikai wantaim rais na kumu. Long ol yia 1800 na 1900 samting, planti milion manmeri i lusim Yurop (planti long Jemani, Itali, Polan, na Spen), na Japan, na ol narapela kantri na i kam sindaun long Brasil.

Long nau, i gat olsem 750,000 Witnes Bilong Jehova insait long winim 11,000 kongrigesen long olgeta hap bilong Brasil. Na ol i stadi Baibel wantaim winim 800,000 manmeri. Bilong wokim ol ples bilong mekim ol miting Kristen, i gat 31 konstraksen tim em ol i save raun na wok wantaim ol Witnes long ol dispela ples, na ol i wokim na stretim olsem 250 i go inap 300 Haus Kingdom long olgeta yia. Kirap long mun Mas long yia 2000, ol i wokim pinis 3,647 Haus Kingdom.