Visitim Mongolia

GENGHIS KHAN, em wanpela man bilong pait na em i bin kirapim bikpela gavman bilong Mongolia long yia 1150 samting. Mongolia i stap namel long Rasia na Saina, na i nogat planti man i stap long dispela kantri.

Mongolia em kantri i gat planti ples i stret we gras i save gro, ol bikpela maunten, ol bikpela wara na ol liklik wara i ron. Na long hap saut bilong Mongolia, ples wesan nating bilong Gobi i stap long dispela hap. Planti man i save long dispela ples, long wanem, bipo ol man i bin painim ol bun bilong ol dainaso long hap. Mongolia i stap inap olsem 1,580 mita antap long mak bilong solwara. Ol man i kolim dispela kantri olsem “Land of Blue Sky,” long wanem, insait long wanpela yia san i save hat tru long winim 250 de!

Long Mongolia, long taim bilong san ples i hat tru (40°C), na long taim bilong kol ples i save kol tru (-40°C). Klostu 33 pesen bilong ol manmeri long Mongolia i raun olsem ol tripman. Long bikmoning, ol man na meri i save go long kisim susu bilong ol meme, ol bulmakau, ol kamel, na ol hos meri. Ol i lain bilong kaikai ol sis na milk samting na ol abus olsem mit bilong sipsip, em wanpela feiveret kaikai bilong ol.

Lain Mongolia i gat pasin bilong singautim ol man i go long haus bilong ol. Planti bilong ol i stap long ol haus sel em ol i kolim ger. Ol i no save lokim dua bilong ol haus sel, olsem na ol man i ken malolo na kaikai long ol dispela haus. Planti taim ol i putim milk na liklik sol long ti bilong givim long ol visita.

Klostu olgeta man long Mongolia i bilong lotu Buda. Sampela i insait long lotu Islam na lotu Kristen na ol narapela i insait long wok bilong lotuim ol spirit. Tasol i gat planti man em ol i no bilong wanpela lotu. Long nau, i gat winim 350 Witnes Bilong Jehova long Mongolia, na ol i skulim winim 770 man long tok bilong Baibel.