Stadi 8
Pasin Bilong Wokim Pas
1 Yumi save wokim planti pas—ating bilong gavman, o bilong Baibel-stadi i stap longwe, o bilong pablisa i go i stap long narapela kongrigesen, o bilong famili. Taim yumi wokim pas bilong salim i go long ol, yumi mas raitim gutpela tok bilong strongim ol. (1 Ko 8:1) Yumi mas raitim klia ol tok na spelim gut.
2 Bilong bisnis na bilong Sosaiti. Taim yu wokim pas olsem, yu mas putim nem bilong yu na atres na det antap long pepa long han sut. (Sapos yu wokim pas bilong i go long Sosaiti, yu ken putim nem bilong kongrigesen bilong yu tu.) Long han kais bilong pepa na i kam daun liklik, yu mas putim nem na atres bilong dispela man o kampani samting yu laik salim pas long em. Bilong kirapim tok bilong pas yu ken tok: “Yes Mr.—.” O sapos yu wokim pas bilong wanpela brata o bilong Sosaiti, yu ken tok: “Yes Brata—,” o “Yes Ol Brata.” Bilong pinisim tok yu ken raitim tok olsem: “Em tasol ol tok bilong mi.” O long pas bilong Sosaiti, yu ken tok: “Mi brata bilong yupela,” o “Mi wanwok bilong yupela.” Taim yu laik raitim dispela laspela tok, lusim arere bilong pepa na kam liklik long namel bilong pepa na kirap long raitim; raitim pinis, orait putim wanpela koma. Aninit yu mas putim nem bilong yu. Long pas bilong Sosaiti, gutpela sapos yu putim wok bilong yu tu, olsem: “Wasman Siaman” o “Wasman Sekit” samting.
3 Taim yu kirap long wokim tok bilong pas, kamapim kwik as bilong tok. Sapos yu bin kisim wanpela pas na yu laik stori long tok bilong en, kamapim tok bilong dispela pas. Taim yu lusim wanpela tok na yu kirap mekim narapela tok, wokim nupela paragraf. Sapos sampela man i bin helpim yu long sampela samting, yu ken tok tenkyu long ol.
4 Sapos yu wokim pas bilong autim gutpela tok long wanpela man, pastaim tokim em yu husat na bilong wanem yu laik salim pas long em. Yu ken lukim Wok Kingdom na kisim Stori Bilong Mun, o kisim sampela tok bilong Wastaua na stori long dispela. Yu ken putim wanpela buklet samting wantaim dispela pas na salim i go long man. Long baksait bilong skin pas raitim nem na atres bilong yu. No ken lusim tingting long stem.
5 Bilong ol famili na pren. Yu ken kamapim sampela gutpela ekspiriens o wanpela gutpela tok yu bin harim long miting. Sapos Baibel-stadi bilong yu i go i stap long narapela hap, yu ken salim pas long em na bai em i ken save yu tingim em. Sapos papamama i bin lainim pikinini long tok bilong Jehova, pikinini i ken wokim pas na tok tenkyu long tupela. Yu ken salim pas long sampela brata o painia ol i bin i go long narapela hap bilong mekim wok autim tok.
6 Laspela tok bilong pas i mas stret long ol narapela tok bilong pas. (Ga 6:18; 2 Ko 13:14; 3 Jo 14) Sapos yumi salim pas long ol brata ol bai save yumi sori long ol.