Stap Amamas Oltaim Long Graun!
Mipela wokim dispela nius bilong helpim yu bambai yu ken save husat i bin wokim graun na olgeta samting i stap long graun. Bai yu save God em i bin wokim graun em i gat nem. Na bai yu save, i gat wanem as na God i bin wokim yumi, na olsem wanem yumi ken i stap amamas oltaim long graun.
Mipela laik bai ol piksa i ken helpim yu long save gut long ol dispela samting. Gutpela sapos yu kaunim ol tok bilong Baibel ol i makim klostu long ol piksa. Olsem bai yu inap kaunim sampela gutpela tok promis bilong God i stap long Baibel, na bai yu inap save long ol samting God i laik bai yu mekim bambai yu inap i stap taim God i truim ol dispela tok promis.
Ating bai yu laik mekim wok long dispela nius bilong helpim ol narapela man. Sapos yu gat pikinini, yu ken mekim wok long en bilong helpim ol pikinini long kisim save long God. Sapos yu stap long wanpela hap i gat planti manmeri ol i no inap kaunim tok, orait, yu ken soim ol piksa long ol na helpim ol long kisim save long ol samting God i laik mekim. Na bai ol tu inap helpim ol narapela man.
Mipela laik bai yu ken lainim ol tok bilong dispela nius na bai rot i op bilong yu ken kisim planti blesing. Na bai yu inap helpim ol narapela man tu long save olsem wanem ol inap i stap oltaim long graun.