Stadi 15
Ol Pren Bilong God i Save Mekim Ol Gutpela Pasin
Sapos yu gat wanpela pren em yu save laikim pasin bilong em na yu litimapim nem bilong em, yu laik kamap wankain olsem em. Baibel i tok: “Bikpela i gutpela na i stretpela olgeta.” (Song 25:8) Bilong i stap pren bilong God, yumi mas mekim gutpela na stretpela pasin. Baibel i tok: “Yupela i stap pikinini bilong em. Olsem na yupela i mas bihainim ol pasin em yet i save mekim. Yupela i mas wokabaut long pasin bilong laikim tru ol arapela.” (Efesus 5:1, 2) Em hia sampela rot bilong mekim olsem:
Helpim ol narapela. “Yumi mas strong tru long mekim gutpela pasin long ol arapela.”—Galesia 6:10.
Wok strong. “Ol stilman i no ken stil moa. Nogat. Nau ol i mas wok. Ol i mas mekim gutpela wok long han bilong ol yet.”—Efesus 4:28.
Stap klin long skin na spirit. “Yumi mas rausim olgeta pasin doti bilong bodi na bilong spirit, na yumi mas kamap klin olgeta long ai bilong God. Na yumi mas pret na aninit long God na yumi mas givim yumi yet olgeta long God na bihainim tru pasin holi oltaim.”—2 Korin 7:1.
Laikim tru famili bilong yu na tingim gut ol. “Yupela man wan wan . . . i mas laikim tru meri bilong yupela, olsem yupela i save laikim yupela yet. Na meri i mas i stap aninit long man bilong en na mekim gutpela pasin long em. Yupela pikinini, yupela i mas bihainim tok bilong papamama bilong yupela.”—Efesus 5:33–6:1.
Laikim ol narapela. “Yumi wan wan i mas laikim tru ol arapela, long wanem, pasin bilong laikim ol arapela em i pasin bilong God.”—1 Jon 4:7.
Bihainim ol lo bilong gavman. “Olgeta man i mas i stap aninit long ol gavman. . . . Wanem samting yupela i mas givim long gavman, orait yupela givim long ol. Yupela i mas givim ol kain kain takis long man bilong kisim takis.”—Rom 13:1, 7.