Kirapim na Strongim Odiens

MASKI ol wokboi bilong God i bungim wanem kain hevi, ol i mas painim ol samting long kongrigesen Kristen bilong strongim ol. Bilong mekim olsem, ol elda i mas mekim ol tok na ol tok kaunsel i strongim bel bilong ol brata. Ol elda i mas i stap olsem ‘ples hait ol man i ken hait long en long taim bilong bikpela win na ren. Na ol i mas i stap tu olsem wara i ran i go long ples drai na olsem bikpela ston i haitim san long ples drai.’​—Ais. 32:2.

Olsem wanem? Sapos yu wanpela elda, ol tok yu mekim i givim nupela strong long ol man na mekim gut bel bilong ol? Ol i givim strong long ol man i wok long i stap gut long Jehova na mekim wok bilong em? Ol i givim strong long ol man long mekim yet laik bilong God maski ol man i no laik harim o ol i birua? Olsem wanem sapos sampela long odiens ol i bel hevi, o ol i gat bikpela hevi bilong mani, o ol i gat wanpela bikpela sik i no gat marasin bilong oraitim? Maus bilong yu i ken “mekim planti toktok bilong strongim” ol brata bilong yu.​—Jop 16:5.

Taim yu mekim ol tok, yu gat rot long helpim ol brata long wetim gutpela samting i kamap bihain na kisim strong i kam long Jehova na ol gutpela samting em i kamapim bilong helpim yumi.​—Ro. 15:13; Ef. 6:10.

Tingim Ol Samting Jehova i Mekim Pinis. Bilong strongim bel bilong ol man, wanpela bikpela samting yu ken mekim i olsem: Kamapim olsem wanem Jehova i bin helpim lain bilong em long bipo long karim ol hevi i bin painim ol.​—Ro. 15:4.

Jehova i tokim Moses long “strongim” Josua taim ol Israel i redi long go insait long Graun Bilong Promis, em ol lain birua i sindaun long en. Moses i strongim em olsem wanem? Long ai bilong Josua, Moses i stori long lain Israel long ol samting Jehova i bin mekim long ol taim ol i lusim Isip. (Lo 3:28; 7:18) Na tu, Moses i stori long ol pait Jehova i helpim ol long winim taim ol i pait wantaim ol Amor. Orait nau Moses i tokim Josua: “Yu mas sanap strong na i no ken surik.” (Lo 31:​1-8) Taim yu laik strongim bel bilong ol brata, yu save helpim ol long kisim strong long rot bilong tingim ol samting Jehova i mekim pinis bilong helpim ol?

Sampela taim ol hevi i daunim tru sampela na ol i tingting planti olsem ol bai kisim ol blesing bilong Kingdom o nogat. Kirapim ol long tingim olsem ol samting Jehova i promis pinis long mekim bai kamap tru.​—Jos. 23:14.

Long sampela kantri gavman i tambuim ol brata bilong yumi long autim tok. Long kain taim olsem, ol elda i gat pasin sori i ken helpim ol wanbilip long kisim strong long stori bilong ol samting i bin painim ol aposel bilong Jisas Krais. (Ap. 4:1–5:42) Na tu, yu ken kamapim olsem wanem Jehova i bin stiaim ol samting olsem Buk Esta i stori long en, na dispela bai kirapim ol brata long strongim bel na no ken pret.

Sampela taim i gat ol man i save kam long ol miting tasol ol i no kamap strong. Ating ol i pilim olsem God i no inap lusim rong bilong ol, long wanem, pastaim wokabaut bilong ol i nogut tru. Ating yu ken stori long pasin Jehova i bin mekim long King Manase. (2 Sto. 33:​1-16) O ating yu ken kamapim stori bilong ol man long taun Korin, ol i bin senisim pasin bilong ol, na kamap Kristen, na God i kolim ol olsem stretpela man.​—1 Ko. 6:​9-11.

Olsem wanem? Sampela i ting ol hevi ol i karim i makim olsem God i no orait moa long ol? Ating yu ken kirapim ol long tingim ol samting i bin painim Jop na ol gutpela blesing em i bin kisim, long wanem, em i stap gut long Jehova. (Jop 1:​1-22; 10:1; 42:​12, 13; Sng. 34:19) Ol pren giaman bilong Jop i mekim tok kranki olsem Jop i bin mekim wanpela sin. (Jop 4:​7, 8; 8:​5, 6) Tasol tok bilong Pol na Barnabas i narapela kain. Taim ol i wok long strongim ol disaipel “long stap strong long bilip,” tupela i tok: “Yumi laik i go insait long kingdom bilong God, tasol pastaim yumi mas wokabaut long rot i gat planti hevi i stap long en.” (Ap. 14:​21, 22) Long nau tu, yu ken strongim ol man i karim hevi taim yu stori olsem olgeta Kristen i mas sanap strong na karim hevi, na long ai bilong God dispela em i bikpela samting.​—Snd. 27:11; Mt. 24:13; Ro. 5:​3, 4; 2 Ti. 3:12.

Kirapim odiens long tingting long ol samting Jehova i bin mekim bilong truim ol tok promis bilong em long laip bilong ol yet. Taim yu kirapim tingting bilong ol, ating ol inap luksave long samting Jehova i mekim pinis bilong helpim ol, olsem em i promis pinis long mekim. Song 32:8 i tok: “Mi laik skulim yu gut, na soim yu long rot yu mas wokabaut long en. Bai mi skulim yu na lainim yu.” Taim yu helpim odiens long tingim gen olsem wanem Jehova i bin stiaim o strongim ol, bai yu helpim ol long luksave olsem Jehova i lukautim ol na em bai helpim ol tru long winim ol traim o hevi i painim ol long nau.​—Ais. 41:​10, 13; 1 Pi. 5:7.

Amamas Long Samting God i Mekim Long Nau. Taim yu laik strongim ol brata, stori long ol samting Jehova i mekim long nau. Sapos toktok bilong yu i kamapim olsem ol dispela samting i amamasim yu, dispela bai kirapim wankain tingting long bel bilong odiens.

Tingim ol samting Jehova i save mekim bilong helpim yumi long karim ol hevi bilong olgeta de. Em i soim yumi nambawan gutpela rot bilong bihainim. (Ais. 30:21) Em i kamapim as bilong pasin raskol, pasin i no stret, stap rabis tru, sik, na indai na em i tokim yumi long olsem wanem em bai pinisim ol dispela samting. Em i givim yumi wanpela lain brata ol i save mekim pasin sori. Pasin bilong beten em i wanpela gutpela presen em i givim long yumi. Em i givim gutpela wok long yumi bilong i stap Witnes bilong em. Em i helpim yumi long save olsem Krais i kamap king pinis long heven na pinis bilong dispela taim nogut i kam klostu.​—KTH 12:​1-12.

Ol narapela blesing yumi kisim em ol miting bilong kongrigesen, na ol kibung sekit na kibung distrik. Taim toktok bilong yu i kamapim olsem yu tingim tru ol dispela samting, dispela bai strongim bel bilong ol narapela long ol i no ken sakim pasin bilong bung wantaim ol brata bilong ol.​—Hi. 10:​23-25.

Ol stori i kamapim olsem Jehova i blesim wok bilong yumi long autim tok em i narapela rot long kisim strong. Taim Pol na Barnabas i wokabaut i go long Jerusalem, ol i mekim ol brata i “belgut tru” taim ol i stori long God i bin tanim bel bilong ol manmeri bilong ol arapela lain. (Ap. 15:3) Yu tu inap givim amamas long ol brata taim yu kamapim ol gutpela ekspiriens long ol.

Taim ol brata i save olsem ol samting ol i mekim i bikpela samting, dispela tu bai strongim ol. Tok amamas long wok ol i mekim long autim tok. Tok amamas long ol brata husat i no inap mekim bikpela wok, long wanem, ol i lapun o ol i gat bikpela sik, tasol ol i stap strong na stap gut long God. Tokim ol olsem Jehova i no save lusim tingting long gutpela wok ol i bin mekim. (Hi. 6:10) Man i holimpas bilip maski traim i painim em, dispela em i bikpela samting tru. (1 Pi. 1:​6, 7) Yumi mas kirapim ol brata bilong yumi long tingim dispela samting.

Givim Bel Long Tokaut Long Gutpela Samting Yumi Wetim. Ol tok promis God i mekim long ol samting bai kamap bihain i save strongim tru ol man i laikim tumas God. Ating klostu olgeta long odiens i bin harim ol dispela tok planti taim. Tasol pasin bilong yu long soim olsem yu amamas tru taim yu toktok long ol dispela promis, em inap helpim ol man long save olsem ol dispela promis i samting tru, na i kirapim ol long bilip olsem ol promis bai kamap tru, na i mekim man i tenkyu tru long ol dispela promis. Taim yu bihainim ol tok yu lainim pinis long Skul Tiokratik, dispela inap helpim yu long mekim olsem.

Jehova yet em i Bikpela Man Bilong Strongim Narapela na Man bilong givim strong long lain bilong em. Tasol yu ken wok gut wantaim em long kamapim ol dispela blesing long ol man. Taim yu toktok long kongrigesen, stori gut long ol dispela gutpela blesing.