Ol Pren Bilong Yumi i Mas Laikim God

OL PREN em ol lain yumi save amamas long toktok na stap wantaim ol. Tasol em i bikpela samting long yumi mas i gat ol gutpela poroman. Yu ting husat em i nambawan gutpela pren yumi inap kisim?— Yes, em God Jehova.

Olsem wanem? Tru tru yumi inap stap pren bilong God?— Baibel i tok Abraham, em wanpela man i bin stap long bipo tru, em i “pren bilong” Jehova. (Jems 2:23) Yu save bilong wanem em i pren bilong Jehova?— Baibel i tok Abraham i bihainim tok bilong God. Em i bihainim tu tok bilong God long taim i hatwok long mekim ol samting God i tokim em long mekim. Olsem na bilong kamap pren bilong Jehova, yumi mas mekim samting em i amamas long en, olsem Abraham i bin mekim na olsem oltaim Bikpela Tisa i bin mekim.—Stat 22:1-14; Jon 8:28, 29; Hibru 11:8, 17-19.

Jisas i tokim ol aposel bilong em olsem: “Sapos yupela i mekim olsem mi bin tokim yupela, orait yupela i stap pren bilong mi.” (Jon 15:14) Olgeta samting Jisas i tokim ol man long en i kam long Jehova, olsem na tok bilong Jisas i makim olsem ol pren bilong em, em ol man i mekim ol samting God i tok ol i mas mekim. Yes, olgeta pren bilong Jisas ol i laikim God.

Sampela gutpela pren tru bilong Bikpela Tisa em ol aposel bilong em, yu inap lukim piksa bilong ol long pes 75 bilong dispela buk. Ol i bin raun wantaim em na helpim em long mekim wok autim tok. Jisas i bin lusim bikpela haptaim bilong em wantaim ol dispela man. Ol i kaikai wantaim. Ol i stori wantaim long God. Na ol i mekim ol arapela samting wantaim. Tasol Jisas i gat planti arapela pren. Em i save stap wantaim ol, na ol i save amamas wantaim.

Wanpela famili em Jisas i save amamas long stap wantaim ol, ol i stap long liklik taun Betani, ausait long bikpela taun Jerusalem. Yu tingim ol?— Em Maria na Marta na brata bilong ol, Lasarus. Jisas i kolim Lasarus olsem pren bilong em. (Jon 11:1, 5, 11) Jisas i laikim dispela famili na em i save amamas long stap wantaim ol, long wanem, ol i laikim Jehova na i mekim wok bilong Em.

Dispela i no makim olsem Jisas i no mekim gutpela pasin long ol man i no mekim wok bilong God, nogat. Em i bin mekim gutpela pasin long ol. Em i go long haus bilong ol na kaikai wantaim ol. Dispela i mekim na sampela man i tok Jisas em i “pren bilong ol man bilong kisim takis na bilong ol man bilong mekim sin.” (Matyu 11:19) Tasol i no olsem Jisas i laikim pasin bilong ol dispela man na long dispela as em i go long haus bilong ol, nogat. Em i go lukim ol na bai em inap tokim ol long Jehova. Em i laik helpim ol long senisim pasin nogut bilong ol na kirap mekim wok bilong God.

Wanpela taim dispela samting i kamap long taun Jeriko. Jisas i laik i go long Jerusalem na em i bihainim rot i go namel long taun Jeriko. Ol manmeri i bung bung na namel long ol i gat wanpela man nem bilong em Sakius. Em i laik lukim Jisas. Tasol Sakius em i sotpela man, na planti man i bung i stap, olsem na em i no inap lukim Jisas. Olsem na em i ran i go pas long rot na go antap long wanpela diwai na bai em inap lukim gut Jisas taim em i kam.

Taim Jisas i kamap long dispela diwai, em i lukluk i go antap na tok: ‘Kam daun hariap, long wanem, nau mi bai kam long haus bilong yu.’ Tasol Sakius i wanpela maniman i bin mekim ol pasin nogut. Bilong wanem Jisas i laik go long haus bilong kain man olsem?—

I no olsem Jisas i laikim pasin bilong dispela man, nogat. Em i go bilong toktok wantaim Sakius long God. Em i luksave long bikpela hatwok dispela man i bin mekim bilong lukim em. Olsem na Jisas i save olsem Sakius inap putim yau. Nau em i gutpela taim bilong toktok wantaim em long pasin God i tok ol man i mas bihainim.

Orait wanem samting i kamap?— Sakius i laikim ol tok Jisas i skulim em long en. Em i sori tru long em i bin giamanim ol man, na em i tok promis long givim bek mani em i bin kisim nating. Em i kamap disaipel bilong Jisas. Bihain long dispela, Jisas na Sakius i kamap pren.—Luk 19:1-10.

Olsem wanem? Sapos yumi bihainim pasin bilong Bikpela Tisa, bai yumi go lukim yet ol man i no pren bilong yumi?— Yes, bai yumi go lukim ol. Tasol i no olsem yumi laikim pasin bilong ol na long dispela as yumi go long haus bilong ol, nogat. Na yumi no inap mekim ol pasin kranki wantaim ol. Yumi go lukim ol na bai yumi inap tokim ol long God.

Tasol yumi amamas tru long i stap wantaim ol gutpela pren bilong yumi. Ol gutpela pren em ol man God i laikim ol. Ating sampela ol i no save Jehova em i husat. Tasol sapos ol i laik kisim save long em, yumi ken helpim ol. Na taim ol i laikim Jehova olsem yumi save laikim em, orait yumi inap kamap gutpela pren tru bilong ol.

I gat narapela rot tu bilong kisim save sapos wanpela man i gutpela bilong pren wantaim em. Lukluk long pasin em i save mekim. Olsem wanem? Em i save mekim pasin nogut long ol arapela na lap long dispela? Dispela i no stret, a?— Oltaim em i save mekim ol samting i givim hevi long em yet? Yumi no laik stap wantaim em na yumi tu i kisim hevi, a?— O ating em i laik mekim ol pasin nogut na ting olsem em i smat moa sapos ol i no painimaut long samting em i mekim? Maski sapos ol man i no kisim save long samting em i mekim, God i lukim pasin em i mekim, a?— Yu ting ol man i mekim ol kain pasin olsem ol i gutpela pren?—

Plis kisim Baibel bilong yu. Yumi ken lukim tok Baibel i mekim long ol samting ol pren inap mekim long i stap bilong yumi. Yumi lukim skripsa long 1 Korin sapta 15, ves 33. Yu painim pinis?— Em i tok: “Yupela i no ken larim ol arapela man i giamanim yupela. Yupela i save long dispela tok, ‘Sapos yumi poroman wantaim ol man nogut, bai ol i bagarapim gutpela pasin bilong yumi.’” Dispela i makim olsem sapos yumi poroman wantaim ol man nogut, yumi tu inap kamap man nogut. Na tu, ol gutpela poroman bai helpim yumi long kamapim ol gutpela pasin.

Yumi no ken tru lusim tingting olsem Man i stap namba wan tru long laip bilong yumi em Jehova. Yumi no laik bagarapim pasin bilong yumi long pren gut wantaim em, a?— Olsem na yumi mas was gut na pren tasol wantaim ol man i laikim God.