Yu Wok Long Bihainim Wanem Rot?

• Planti man i givim bel olgeta long ol samting ol i save mekim long olgeta de, olsem na ol i no tingting tumas long wanem rot ol i bihainim.

• Baibel i tokim yumi long ol gutpela samting tru bai kamap bihain. Baibel i mekim tok lukaut tu olsem bikpela senis bai painim ol oganaisesen bilong ol man long olgeta hap. Bilong dispela tok i ken helpim yumi na yumi ken abrusim bagarap, yumi mas mekim sampela samting hariap.

• Sampela manmeri i save long tok bilong Baibel na ol i traim long bihainim, tasol ol i larim ol hevi bilong laip i pulim nabaut tingting bilong ol.

• Olsem wanem? Yu amamas long rot yu wok long bihainim? Taim yu tingting long mekim ol samting, yu save tingim ol dispela samting bai mekim wanem long ol mak yu laik winim long laip bilong yu?

[Blok/Ol Piksa long pes 9]

Wanem Samting i Nambawan Bikpela Samting Long Yu?

Ol samting mipela i kolim daunbilo i bikpela samting long yu olsem wanem? Makim wanpela namba long ol, namel long 1 i go inap 10.

Planti bilong ol dispela samting i stret long yumi mekim, tasol sapos yu mas makim wanem samting i bikpela samting, wanem samting bai stap namba wan? namba tu? na i go olsem.

․․․ Amamas/spot samting

․․․ Wok mani bilong mi

․․․ Helt bilong mi

․․․ Amamas bilong mi

․․․ Poroman marit bilong mi

․․․ Papamama bilong mi

․․․ Ol pikinini bilong mi

․․․ Naispela haus, ol gutpela klos

․․․ Stap nambawan long olgeta samting

․․․ Pasin bilong lotuim God

[Blok long pes 10, 11]

Ol Samting Yu Makim Bilong Mekim i Helpim Yu Long Wokabaut Long Rot Yu Laikim?

TINGIM OL DISPELA ASKIM

AMAMAS/SPOT SAMTING: Ol samting mi mekim bilong painim amamas i save givim nupela strong long mi? Dispela amamas i narapela kain na inap bagarapim helt bilong mi o bagarapim tru sampela hap bodi bilong mi? Em i wanpela kain “amamas” i givim bikpela amamas tru inap long sampela aua, tasol bihain bel bilong mi i bagarap inap oltaim bihain? Maski amamas mi laik painim i gutpela, mi save lusim bikpela haptaim long en na nau mi no gat taim long mekim ol samting i bikpela samting moa?

WOK MANI BILONG MI: Em i rot bilong kisim ol samting bilong skin mi mas kisim, o mi save givim bel olgeta long en? Dispela wok i kisim bikpela haptaim na strong bilong mi na dispela i laik bagarapim helt bilong mi? Mi amamas moa long wok ovataim o mi amamas moa long stap wantaim poroman marit o ol pikinini bilong mi? Sapos bos bilong mi i tokim mi long mekim ol wok em bel bilong mi i gat tok long en o i pasim mi long mekim ol wok bilong spirit, bai mi mekim dispela wok na ol i no ken pinisim mi long wok?

HELT BILONG MI: Mi no save tingim helt bilong mi, o mi save lukautim oltaim na bai mi no ken sik planti? Mi save toktok oltaim long helt bilong mi? Ol samting mi mekim bilong lukautim helt bilong mi i soim olsem mi save tingim famili bilong mi?

AMAMAS BILONG MI: Em namba wan samting mi save tingim? Mi save putim dispela i go pas long amamas bilong poroman marit o bilong famili bilong mi? Ol samting mi mekim bilong i stap amamas i stret wantaim wok mi mekim olsem man i lotuim trupela God?

POROMAN MARIT BILONG MI: Mi save tingim man o meri bilong mi i poroman bilong mi taim dispela i stret wantaim laik bilong mi yet, tasol long ol arapela taim nogat? Mi save rispek long poroman bilong mi, na tingim olsem em i wanpela man o meri mi mas givim biknem long em? Pasin bilong bilip long God i stiaim pasin bilong mi long tingting long poroman marit bilong mi?

PAPAMAMA BILONG MI: Sapos mi yangpela yet, mi save bihainim tok bilong papamama bilong mi​—⁠bekim tok long pasin rispek, mekim ol wok ol i makim mi long mekim, kam long haus long taim ol i makim, abrusim ol poroman na pasin ol i bin givim tok lukaut long en? Sapos mi bikpela pinis, mi save rispek long papamama na putim yau long tok bilong ol, na helpim ol long taim i gat wok long mekim olsem? Tok Bilong God o ol samting i gutpela long mi yet i stiaim pasin mi save mekim long ol?

OL PIKININI BILONG MI: Mi pilim olsem em i wok bilong mi long skulim ol pikinini bilong mi long bihainim stretpela pasin, o mi ting em wok bilong skul long mekim olsem? Mi save lusim haptaim bilong poroman wantaim ol pikinini bilong mi, o mi ting ol toi, TV, o kompiuta i ken poromanim ol? Long olgeta taim mi save stretim ol pikinini taim ol i sakim tok bilong God, o mi stretim ol taim ol i skrapim bel bilong mi tasol?

NAISPELA HAUS, OL GUTPELA KLOS: Wanem samting i kirapim mi long tingim lukluk bilong mi na ol kago samting bilong mi​—⁠mi tingim ol neiba bai i gat wanem tingting long mi? mi tingim sindaun bilong famili? mi tingim olsem mi wanpela man bilong lotuim God?

STAP NAMBAWAN LONG OLGETA SAMTING: Mi ting em i bikpela samting long mi mas mekim gut ol samting? Mi wok strong bilong i stap nambawan? Mi tingting planti sapos wanpela i mekim gut moa wanpela wok samting, winim mi?

PASIN BILONG LOTUIM GOD: Em i bikpela samting long mi long God i ken orait long mi, o em i bikpela samting moa long poroman marit, ol pikinini, papamama, o bos i mas orait long mi? Bilong holimpas gutpela sindaun, mi redi long putim wok bilong God i stap namba tu?

TINGIM GUT TOK KAUNSEL BILONG BAIBEL

Pasin bilong lotuim God i bikpela samting olsem wanem long laip bilong yu?

Saveman 12:13: “Namba wan samting long laip bilong yumi man i olsem. Yumi mas aninit long God tasol na bihainim ol lo bilong em.”

ASKIM YU YET: Pasin bilong mi long wokabaut i soim olsem mi bihainim dispela tok? Pasin bilong bihainim ol lo bilong God i makim pasin mi bihainim bilong mekim ol wok bilong mi long haus, ples wok, o long skul? O ol dispela arapela samting o ol hevi bilong laip i mekim na mi givim haptaim bilong mekim wok bilong God o nogat?

Yu pas gut wantaim God o olsem wanem?

Sindaun 3:​5, 6: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.”

Matyu 4:10: “Yu mas aninit long God, Bikpela bilong yu. Na yu mas lotu long em wanpela tasol.”

ASKIM YU YET: Mi gat dispela tingting long God? Ol samting mi mekim long olgeta de, na ol samting mi mekim taim hevi i kamap, i soim olsem mi bilip long God na givim bel bilong mi long em?

Pasin bilong ritim na stadi long Baibel em i bikpela samting long yu?

Jon 17:3: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.”

ASKIM YU YET: Pasin bilong mi long ritim Tok Bilong God na skelim gut long bel i soim olsem mi bilip tru long dispela tok?

Pasin bilong go long ol miting Kristen em i bikpela samting long yu?

Hibru 10:​24, 25: “Yumi wan wan i mas tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol. Na yumi ol manmeri bilong God i no ken lusim pasin bilong bung wantaim, . . . De bilong Krais em i kam klostu. Olsem na yumi wan wan i mas wok strong moa long strongim bel bilong ol arapela.”

Song 122:1: “Ol i tokim mi olsem, ‘Goan, yumi go long haus bilong Bikpela.’ Ol i tok olsem na mi belgut tru.”

ASKIM YU YET: Pasin bilong mi long wokabaut i soim olsem mi pilim tru tok Baibel i mekim long dispela samting? Long mun i go pinis, mi bin lusim sampela miting Kristen, long wanem, mi larim ol arapela samting i go pas long ol miting?

Yu save givim bel long tokim ol arapela long God na long samting em i tingting pinis long mekim?

Matyu 24:14: “Bai ol i autim dispela gutnius bilong kingdom bilong God long olgeta hap bilong graun, . . . na bihain tasol bai las de i kamap.”

Matyu 28:​19, 20: “Yupela i mas i go mekim olgeta lain manmeri i kamap disaipel bilong mi. . . . Na yupela lainim ol long bihainim olgeta tok mi bin givim long yupela.”

Song 96:2: “Singim song long Bikpela. Litimapim nem bilong en. Long olgeta de yupela i mas tokaut olsem, Bikpela i save kisim bek ol manmeri.”

ASKIM YU YET: Mi putim dispela wok i stap olsem wanpela bikpela samting long laip bilong mi olsem i stret mi mas mekim? Ol samting mi mekim long dispela wok i kamapim klia olsem mi bilip olsem taim yumi stap long en em taim bilong las de?