Pas i Kam Long Gavening Bodi

Bilong Ol Bratasista Bilong Mipela:

Long pablik edisen bilong Wastaua bilong Janueri 1, 2008, em fes taim Wastaua i kamapim ol naispela atikol long dispela nupela hap “Bihainim Bilip Bilong Ol.” Kirap long dispela taim, long olgeta tripela mun i gat nupela atikol long dispela hap, em yumi amamas long ritim!

Ol dispela stori i mekim wanem long ol man? Bihain long wanpela meri i ritim stori bilong Marta, em i tok: “Mi lap taim mi ritim bikos mi wankain olsem em—mi laik lukautim gut ol man mi singautim na bisi long wok, tasol sampela taim mi lusim tingting long stop na amamas wantaim ol pren.” Wanpela tineja i kamapim dispela naispela poin long stori bilong Esta: “Mi kisim skul olsem yumi inap tingting tumas long ol klos na ol nupela stail. Yumi mas bilas gut; tasol yumi no ken abrusim mak. Jehova i tingim samting i stap long bel bilong yumi.” Na wanpela atikol i stori long aposel Pita i kirapim wanpela sista Kristen long tok: “Mi inap piksaim gut ol samting i kamap long dispela stori. I olsem mi stap long hap! Mi inap lukim, harim, tatsim, smelim, na teistim ol samting em stori i kamapim.”

Ol dispela lain—na planti narapela husat i bin rait i kam bilong tok tenkyu long ol dispela atikol—i strongim tok aposel Pol i raitim planti yia i go pinis: “Olgeta tok ol i bin raitim long bipo, ol i bin raitim bilong skulim yumi.” (Rom 15:4) Yes, Jehova i kamapim ol dispela stori long Baibel bilong skulim yumi long ol bikpela lesen. Yumi olgeta, maski yumi stap planti yia long tok i tru, yumi ken kisim skul long ol.

Mipela i laik kirapim yu long kirap hariap long ritim dispela buk. Yusim tu long Famili Lotu—ol pikinini bai laikim! Taim kongrigesen i mekim stadi long en long taim bilong Kongrigesen Baibel Stadi, go long olgeta wik! Ritim gut; no ken hariap. Yusim pasin bilong yu long piksaim ol samting; lukim, harim, tatsim, smelim, na teistim. Traim long pilim ol samting ol man Baibel i stori long ol i pilim, lukim ol samting ol i lukim. Skelim pasin ol i mekim taim hevi i kamap wantaim pasin yu bai mekim.

Mipela i amamas tru long serim dispela buk wantaim yupela. Dispela buk i ken stap olsem gutpela presen long yu na famili bilong yu. Mipela i laikim yupela na mipela i laik gutpela samting i ken kamap,

Gavening Bodi Bilong Ol Witnes Bilong Jehova