ROT BILONG YUSIM DISPELA INDEKS
Ol Witnes Bilong Jehova i amamas long wokim dispela Skripsa Indeks i kamapim ol buk na nius ol i bin wokim o stretim insait long 2001-2010. Indeks bai helpim yu tru long wok bilong yu long autim tok, mekim ol wok bilong kongrigesen, na stadi bilong yu yet.
Ol Skripsa Ol i Putim. Ol i putim tasol ol skripsa ol buk na nius i stori long mining bilong en. Olsem na sapos buk o nius i kamapim mining bilong skripsa, bikpela stori bilong en, bilong wanem ol i raitim dispela skripsa, o i kamapim klia mining bilong ol tok long tok ples ol i bin raitim Baibel pastaim long en, orait ol i putim dispela skripsa long Indeks, long wanem, ol buk na nius i kamapim mining bilong skripsa o hap bilong en.
Ol i no putim ol skripsa ol i yusim bilong truim sampela tok em ol buk na nius i no kamapim mining bilong ol. Olsem: Buk o nius inap kolim Kamapim Tok Hait 14:1 bilong soim olsem 144,000 manmeri tasol bai go long heven. Ol bai no putim dispela skripsa long Indeks, long wanem, buk o nius i no kamapim mining bilong en.
Rot Bilong Painim Ol Tok i Kamapim Mining. Namba bilong ol pes ol referens i makim (olsem 23-5) em ol pes i kolim skripsa na kamapim mining bilong en. Ating skripsa i no stap long namba wan pes referens i kolim, tasol ol tok bilong kamapim mining bilong skripsa i kirap long dispela pes. Sampela taim tok i kamapim mining bilong ves i kirap, bihain sampela tok bilong narapela samting i kamap, na bihain long en tok i kamapim mining bilong ves i stat gen. Olsem na yu mas ritim olgeta pes referens i kolim.
Lista Bilong Ol Buk na Nius. Ol i bungim ol referens bilong wan wan yia, ol i raitim pastaim yia i klostu long nau. Insait long wan wan yia ol i kolim pastaim Wastaua, na bihain ol Baibel, ol buk, ol buklet, Kirap!, na Wok Kingdom Bilong Yumi. Ol referens bilong Wastaua, Kirap!, na Wok Kingdom Bilong Yumi, pastaim ol i raitim namba wan nius bilong yia na i go long laspela nius bilong yia.
Pasin Bilong Makim Ol Pes Bilong Ol Referens. Mipela i makim ol pes bilong ol referens olsem: Sapos referens i kolim lv 70-83 dispela i makim buk “Stap Insait Yet Long Pasin Laikim Bilong God,” pes 70 i go 83; o yu lukim referens olsem w05 9/15 30-1, dispela i makim Wastaua bilong 2005, Septemba 15, pes 30 na 31.
Mipela i bilip olsem dispela Indeks bai helpim yu olsem wanpela gutpela sumatin bilong Baibel long ‘wokabaut long pasin bilong ol manmeri tru bilong Bikpela, na bai em i laikim olgeta pasin bilong yu. Na bai yu mekim planti kain gutpela wok. Na bai yu save long God, na oltaim dispela save bai i kamap bikpela moa.’—Kol. 1:10.