Tok Bilong God i Gat Laip
Yu Pret Long Ol Narapela Man i Ting Olsem Wanem Long Yu?
DISPELA yangpela meri long piksa, em i stap long skul. Em i tok: “Ol Witnes Bilong Jehova ol i no Kristen. Ol i no save mekim Krismas.” Ol narapela wanskul tu i kirap na tok bilas long ol Witnes.
Sapos yu wanpela yangpela Witnes na yu stap wantaim ol taim ol i mekim kain tok olsem, bai yu mekim wanem? Ol dispela skul manki i no save Krismas em i samting bilong ol haiden na ol Kristen bilong pastaim i no bin mekim Krismas. Na ol i no save ol dispela narapela tok nogut ol i mekim long ol Witnes, ol dispela tok tu i giaman. Tasol olsem wanem sapos ol i mekim ol dispela kain tok na wanpela i tanim na i tok long yu, olsem: “Yu wanpela Witnes Bilong Jehova, a?” Bai yu tok wanem?
Kain samting olsem i bin painim aposel Pita taim ol birua i laik kilim i dai Jisas. Long nait ol i kisim Jisas i go long haus bilong hetpris.Ol hetman bilong lotu i bung i stap. Pita i bihainim ol na em i wet ausait, long banis bilong haus. Wanpela wokmeri bilong hetpris i lukim Pita na em i tok: “Dispela man tu em i bin i stap wantaim Jisas.” Tasol Pita i tok nogat.
Bihain liklik narapela man i lukim Pita na i tok: “Yu tu yu man bilong lain bilong ol.” Tasol Pita i tok, “Mi nogat.” Bihain klostu wan aua i go pinis na sampela moa i tok strong, olsem: “Tru tumas, dispela man tu i bin i stap wantaim em. Em i man bilong Galili tasol.” Lukim piksa daunbilo. Pita i bekim tok, olsem: “Man, mi no save long dispela tok yu mekim.”—Luk 22:54-60; Mak 14:53-71.
Tasol Pita i giaman. Em i save long Jisas. Sampela aua bipo em i bin tokim Jisas: Bikpela, mi redi pinis long i go wantaim yu long kalabus. Mi redi long i dai tu wantaim yu.” (Luk 22:33) Olsem wanem na bihain Pita i tok em i no save long Jisas? Em i pret. Long dispela nait, ol i paulim tok i tru. Samting i stret ol i mekim olsem i no stret, na man i no gat rong ol i tok em i gat rong. Pita i pret long ol narapela man bai ting olsem wanem long em o mekim wanem long em, na em i mekim tok giaman. Em i no litimapim nem bilong God o nem bilong Pikinini bilong God, em Krais Jisas.
Kain samting olsem inap kamap long nau tu. Tru, Pita i hevi tru long dispela samting em i bin mekim na God i tekewe rong bilong em. (Luk 22:6l, 62) Tasol gutpela sapos em i no bin mekim olsem! Olsem wanem long yu? Yu redi long sanap strong long kain traim olsem? Olsem wanem long taim bilong Krismas samting? Sapos ol man i tok bilas long bilip bilong yu, yu redi long sanap strong na litimapim nem bilong God na Krais maski wanem wanem samting i painim yu?