Ol i Bihainim Stretpela Pasin

□ Ol pikinini tu inap bihainim stretpela pasin. Yujin (Eugene) i gat 7-pela krismas na long ples kibung em i painim wanpela liklik hap mani, olsem 1 toea. Em i go long Dipatmen bilong Ol Samting i Lus na givim dispela mani long brata i lukautim dispela dipatmen. Brata i tokim em: ‘Em liklik mani tru. Bilong wanem yu kisim i kam? Ol man inap baim wanem samting long dispela liklik mani?’ Yujin i tok: ‘Ol inap baim wanpela loli.’ Em i strong long givim dispela mani long dispela dipatmen, long wanem dispela mani i no mani bilong em na em i no laik holim na bai Jehova i kros long em. Brata i tokim em: ‘Yu mekim gutpela pasin. Tenkyu tru. Gutpela sapos papa bilong dispela mani i kam painim dispela 1 toea bilong em i lus.’

□ Long narapela bikpela kibung bilong ol Witnes Bilong Jehova ol liklik pikinini i painim pinis sampela bikpela mani, olsem K20 samting, na ol i kisim i go givim long Dipatmen bilong Ol Samting i Lus. Papamama i no kirapim ol long mekim; ol yet i mekim. Planti taim long ol bikpela kibung bilong ol Witnes kain stretpela pasin olsem i save kamap.

Ol man i laik bai God i orait long ol, ol i mas bihainim stretpela pasin. Man i wokabaut stret long olgeta taim, em i ‘pilim olsem bel bilong em i stret long ai bilong God’ na em i ken amamas. (Hibru 13:18) Tru tumas, stretpela pasin i save kamapim gutpela kaikai.