Jehova i Helpim Trinidad
LONG yia 1912 liklik lain tasol ol i autim tok bilong Kingdom long Trinidad na long narapela ailan klostu, em Tobago. Tasol wok i kamap bikpela na long Mas 1985 ol i wokim pinis na dediketim nupela haus brens long Trinidad. Nupela haus brens i stap ausait liklik long nambawan biktaun, em Pot ov Spen. Kirap long taim ol i wokim haus brens long bipo inap long taim ol i wokim dispela nupela haus brens, lain bilong autim tok bilong Kingdom long Trinidad i go bikpela inap 79 pesen.
Trinidad em i liklik ailan na planti man i pulap long en, olsem na i hatwok long kisim graun bilong wokim nupela haus brens. Pe bilong graun i bikpela na pe bilong wokim haus i bikpela. Tasol Jehova i helpim ol na ol i wokim nupela haus brens. Ol i kisim gutpela hap graun klostu long bikrot i go long ples balus. Olgeta brata i givim bel long helpim dispela wok. Klostu olgeta pablisa long Trinidad i bin mekim sampela wok long wokim dispela nupela haus.
Long olgeta Sarere Sande ol i makim wanpela kongrigesen bilong i kam helpim wok, na ol brata sista long narapela kongrigesen i wokim kaikai na givim koldring samting long ol. Tupela o tripela taim long wik ol i wok nait tu. Maski taim bilong ren, ol i wok i go. Taim ol i laik putim namba wan plua simen, inap 350 brata i stap—ol i pulimapim simen long ol baket na narapela brata i givim long han bilong narapela brata. Ol Hindu i stap klostu ol i kirap nogut tru! Rot i op bilong autim tok long ol.
Ol brata i givim bel tu long givim mani bilong baim ol samting bilong wokim haus. Sampela sista i givim bilas gol bilong ol bilong baim i go long ol man na mani ol i kisim long dispela em bilong helpim ol long wokim haus. Wanpela manki i gat 8-pela krismas em i raitim pas na em i tok: ‘Mi save amamas long wok wantaim papa bilong mi long wokim dispela nupela haus, tasol baksait bilong papa i save pen, olsem na mi no inap i kam planti taim. Olsem na mi salim dispela liklik mani bilong mi bilong helpim dispela wok.’
Taim ol brata i mekim dispela wok, ol i lukim olsem Jehova i helpim ol. Hilary Charles, em bosman bilong wok, em i tok, wanpela taim i gat 10-pela bek simen tasol i stap na ol i telefon long faktori bilong kisim sampela moa. Em i stori moa, olsem: “I hatwok long kisim. Ol i tok, mipela i mas wet inap long wik antap. Mipela i telefon long 9 klok moningtaim. Long 2 klok apinun, mi lukim wanpela trak i kisim simen i kam. Draiva i tok, ‘Dispela simen em bilong narapela lain, tasol ol i tokim mi long kisim i kam hia.’ Em i no save, tasol em i han bilong Jehova.”
Dispela nupela haus brens i gat tupela plua na ol i wokim olsem wanpela T. Dua bilong go insait i stap long hap antap, long hap bilong saut, na long han sut i gat gutpela Haus Kingdom i stap em inap long 200 man. Long han kais bikpela ofis i stap. Long stik bilong T, olsem long longpela hap, daunbilo i gat ples bilong wokim ol nius samting na ples bilong salim ol buk samting i go long ol brata, na ples bilong wasim laplap. Antap i gat haus kuk, na rum kaikai, na 8-pela rum slip, olgeta wan wan i gat ples waswas bilong en yet. Long plua antap long ofis i gat liklik laibreri i stap na ples bilong sindaun.
Long Sarere, Mas 16 ol i dediketim dispela nupela haus. Brata Milton Henschel bilong Lain Bilong Bosim Ol Witnes, em i mekim tok. Em i tok, “Jehova i save long ol samting yumi sot long en na long rot bilong helpim yumi long kisim ol dispela samting.” Tru tumas, dispela nupela haus brens i olsem wanpela gutpela presen i kam long Jehova. Long pinis bilong bung bilong dediketim haus ol i beten strong na tok dispela haus em i bilong mekim wok bilong Jehova. Mipela i amamas tru!
Ol Witnes Bilong Jehova long Trinidad na Tabago i amamas long Jehova i mekim wok i go bikpela. Jehova i helpim ol na ol i kisim dispela gutpela samting bilong helpim ol long autim tok bilong Kingdom na nau ol i laik wok strong moa yet.