Maski Man i Gat Planti Samting o Em i Stap Rabis, Em i Mas Was Gut
OLSEM WANEM? Baibel i tok yumi no ken kisim planti samting na yumi mas i stap rabis? Planti man i ting olsem. Tasol tupela Provep inap helpim yumi long save gut long dispela samting.
Provep 10:15 i tok: “Ol planti samting bilong maniman i banisim ol na ol i stap gut, olsem taun i gat strongpela banis. Tasol ol rabisman i sot long ol samting, olsem na bai ol i bagarap.” Na Pr 10 ves 16 i tok: “Stretpela man bai i kisim laip olsem pe bilong en. Tasol ol man nogut i wok long kamapim planti sin tasol.” Dispela tupela tok i stret wantaim.
Pr 10 Ves 15 i tok, sapos wanpela man i gat planti samting, dispela inap helpim em, na sapos man i stap rabis, dispela inap nogutim em. Man i gat mani na planti samting bilong skin, dispela inap lukautim em na helpim em long abrusim sampela hevi i save painim ol man. Tasol man i stap rabis, ating em i gat planti hevi, long wanem taim wanpela samting em i no bin ting long en i kamap, em i no gat mani samting bilong helpim em. Baibel i kolim stret samting tru i save kamap.—Eklisiastis 7:12.
Tasol ol tok bilong ves 15 inap kirapim maniman wantaim rabisman long was gut. Planti maniman i bilip tru long mani bilong ol; ol i ting mani tasol inap helpim ol. (Provep 18:11) Tasol mani i no inap helpim maniman long kisim gutnem long ai bilong God o kisim amamas i stap oltaim. Sampela taim mani kago bilong em inap givim hatwok long em na ating em i no inap kisim. Jisas i mekim wanpela tok piksa i kamapim gut dispela samting. Em i stori long wanpela maniman i wokim ol bikpela bikpela haus bilong bungim ol kaikai long en, tasol em i stap rabis long ai bilong God. (Luk 12:16-21; 18:24, 25) Na planti rabisman ol i popaia na ol i ting olsem ol i stap rabis na ol i bilong bagarap tasol.
Ves 16 i stretim gut tingting bilong yumi long dispela samting. Stretpela man, maski em i gat bikpela mani o em i stap rabis, tasol em inap amamas long ol wok em i mekim. Pe em i kisim long wok bilong em, em i no larim dispela samting i bagarapim em long ai bilong God. Nogat. Ol wok stretpela man i mekim i helpim em long i stap amamas long nau, na bai em inap kisim laip oltaim long bihain. (Jop 42:10-13) Tasol man nogut, maski em i kisim bikpela mani, dispela i no inap helpim em. Em i no pilim gutpela wok mani inap mekim bilong lukautim em; em i no bihainim laik bilong God. Em i mekim wok long mani bilong em bilong kamapim planti sin.