Ol i Mekim Nogut Yet Long Ol Witnes Long Burundi
LONG kirap bilong yia 1989, ol bos bilong kantri Burundi long Afrika i kirap mekim nogut long ol Witnes Bilong Jehova. Wastaua bilong Oktoba 1, 1989 i bin stori long dispela samting. Polis i bin holim sampela Witnes, na ol i bin paitim sampela Witnes, na ol i bin mekim sampela samting moa nogut long ol brata bambai ol i lusim bilip bilong ol. Orait, olsem wanem long nau? Ol i mekim nogut yet long ol Witnes o nogat?
Mipela kisim narapela ripot i kam long Burundi na ripot i tok, taim wasman distrik i go long Kinyinya na Gitega, polis i laik holim olgeta brata sista bilong kongrigesen ol i kam long miting. Ol i no holim wasman distrik na wasman sekit, tasol ol i holim planti brata sista, em tupela sumatin bilong haiskul na wanpela pikinini meri i go long komiuniti skul ol i insait long dispela lain. Polis i paitim olgeta. Long tumora ol i kisim ol dispela Witnes i go kot long nambawan gavman bilong dispela hap, na ol i mas tokim em bilong wanem ol i no inap insait long pati politik. Bihain ol i paitim gen ol dispela Witnes. I gat sampela ripot moa tu i stori long kain hevi olsem i painim ol Witnes.
Wanpela elda Kristen i lukautim wok bilong ol Witnes long Burundi, em i raitim pas i kam na em i tok: “No gat wanpela Witnes i bin stil o kilim man i dai o wok long daunim gavman na polis i holim em. Nogat tru. Sapos i gat as tru na gavman i laik givim strafe long ol Witnes, orait ol i mas putim ol Witnes long kot long ai bilong ol man. Ol i no ken mekim nogut long ol manmeri bilong dispela kantri ol i save stap isi na sindaun gut. Ol i no ken kisim ol samting bilong ol na ronim ol olsem ol i wel animal. Planti brata long hap bilong bus ol i mas ranawe lusim haus bilong ol na ol i stap nabaut long bus olsem ol ranaweman. Wanpela sista, em man bilong em i stap kalabus, em i save go lukim ol bikman na askim ol long larim man bilong em i lusim kalabus. Long olgeta taim ol i save bekim tok long em, olsem: ‘Mipela i no ken larim em i lusim kalabus, long wanem yupela i save kisim mani long ol man bilong ol narapela kantri bilong daunim gavman bilong kantri bilong yumi.’ Dispela tok i no stret liklik!”
Tasol i gat gutpela tok tu i kam long Burundi, em olsem: Ol Witnes i no pret o surik. Ol i was gut na wok yet long autim gutpela tok bilong Kingdom na wok bilong ol i go bikpela. Ol brata sista i save, sapos ol i bilip tru long Jehova na wetim em i helpim ol, bai ol inap karim dispela hevi na sanap strong. I gat planti pas i go pinis long Burundi bilong tokim gavman, ol man i no amamas liklik long dispela pasin ol i mekim long ol Witnes, na taim ol manmeri long olgeta hap i save ol Burundi i mekim nogut yet long ol Witnes Bilong Jehova, orait bai ol i raitim planti pas moa i go.
[Blok long pes 30]
Atres bilong presiden bilong Burundi em olsem:
His Excellency Major Pierre Buyoya
President of the Republic of Burundi
Bujumbura
REPUBLIC OF BURUNDI