Bihainim Stretpela Pasin—Em Gutpela Rot

BAIBEL i tok, stretpela pasin em i gutpela pasin na ol Kristen tru i mas bihainim stretpela pasin. (Matyu 22:39; 2 Korin 8:21) Na man i bihainim stretpela pasin em i bihainim gutpela rot tru bilong helpim em. Planti manmeri long nau ol i bin kisim stretpela save long ol tok bilong Baibel na dispela i bin kirapim ol long tanim bel na stretim tingting bilong ol, na nau ol i bihainim stretpela pasin na dispela i bin helpim ol. Tingim dispela stori i kam long Laibiria:

Wanpela elda Kristen wantaim meri bilong em tupela i tingting gut pastaim na beten long God na tupela i pinisim wok bisnis bilong ol long samapim ol klos. Bilong wanem ol i mekim olsem? Long wanem wok bisnis bilong tupela i pulim bikpela hap taim tumas bilong ol na i pasim rot bilong ol long mekim wok bilong God na long stadi. Tupela i tingting long kisim ol pen bilong penim laplap na baim i go long ol man bambai ol i ken kisim liklik wansiling bilong lukautim ol. Tasol taim ol i kirap long mekim olsem, wantu tasol pe bilong dispela kain pen i go liklik tru na nau tupela i no inap kisim mani inap long lukautim famili. Bai tupela i mekim wanem?

Ol i tokim kampani ol i baim pen long en long daunim pe bilong pen liklik bambai tupela inap baim i go long ol man na kisim liklik profit mani, tasol kampani i no laik mekim. Tasol kampani i tok, sapos tupela i laik, orait bai kampani i raitim tupela pepa, long wanpela bai ol i raitim pe tru bilong pen na long wanpela bai ol i raitim pe i liklik, na bai tupela i ken givim namba tu pepa long ol man bilong kastam na tupela i no ken baim bikpela takis. Sapos elda i brukim lo olsem bai em inap kisim olsem K2,000 profit mani long olgeta taim em i baim pen long dispela kampani.

Tasol brata i no laik insait long wanpela pasin i no stret. Em i no laik mekim dispela pasin giaman na bai gavman i no kisim takis ol i mas kisim. Ol bikman bilong dispela kampani i kirap nogut long dispela samting. Ol i raitim pas long elda na ol i tok: “Mipela pilim tru gutpela pasin bilong yu, olsem bel bilong yu i gat tok long dispela samting.” Na ol i makim dispela elda tasol olsem man bilong baim pen bilong ol i go long ol bisnis long olgeta hap bilong Laibiria. Long dispela rot em inap lukautim gut famili bilong em long ol samting bilong skin, olsem na em wantaim meri bilong em inap mekim wok painia haptaim na wok gut wantaim ol brata sista na strongim kongrigesen. Tupela i bihainim stretpela pasin na tupela i kisim blesing.

Ol samting i bin painim wanpela man long Spen, nem bilong em Alfonso, i lainim em olsem sapos em i bihainim stretpela pasin em i bihainim gutpela rot bilong helpim em. Taim em i manki yet na em i gat 12-pela krismas tasol, em i bin lusim papamama na i no longtaim na em i kirap mekim wanpela wok nogut—em i baim drak i go long ol man. Na em i save brukim ol ka na haus na stua na stilim ol samting. Sampela taim, long wanpela de tasol em i stilim ol samting long 10-pela stua. Taim em i gat 21 krismas, 4-pela poroman bilong em i paitim em nogut tru na stilim olgeta drak em i holim na ol i tokim em, sapos em i go kamapim ol long polis bai ol i kilim em i dai. Em i pret long i go long ol polis na em i pret tu long i go long haus sik, long wanem ol polis i save long em.

Taim skin bilong Alfonso i wok long orait bek, Alfonso i wok long skelim pasin em i save mekim. Em i tingim sampela tok bilong Baibel na lo Kristen em mama i bin tokim em long en taim em i liklik yet. Taim em i liklik, em i bin sakim tok bilong mama, tasol nau em i kirap tokim ol Witnes Bilong Jehova long stadi wantaim em na lainim em long ol tok bilong Baibel. Insait long 6-pela mun tasol, em i senisim pasin bilong em olgeta na em inap long kisim baptais.

Tasol long de paslain long taim em i laik kisim baptais, em i kisim kotpepa i tok, em i mas kot long wanpela rong em i bin mekim, em i bin holim gan na stilim sampela samting. Em i bin mekim dispela rong longtaim liklik long bipo. Tasol Alfonso i go long kot na tokim ol olsem tru em i bin mekim dispela rong, olsem na ol i putim em long kalabus na em i wetim kot. Loya bilong helpim em long kot i strong long Alfonso i mas tok olsem em i no bin stilim wanpela samting na em i no bin holim gan. Tasol Alfonso i strong long em i mas mekim tok i tru tasol na em i no ken giaman. Polis bilong kotim Alfonso em i tok, dispela rong Alfonso i bin mekim i bikpela rong tru na polis i save em i bin mekim planti rong long bipo, olsem na kot i mas givim 13 yia kalabus long em. Tasol kot i tingim gutpela pasin bilong Alfonso na em i no bin giaman, olsem na kot i givim 6-pela mun tasol long em, na em i winim pinis 6-pela mun long kalabus taim em i wetim kot.

Nau Alfonso wantaim meri bilong em i stap gut long wok bilong Jehova na ol i stap amamas, long wanem ol i gat gutpela wok bilong mekim na ol i save pinis olsem man i bihainim stretpela pasin em i bihainim gutpela rot.