Em i Lukim Liklik Nius Long Rot

LONG yia 1921, long ples maunten bilong Transval, em wanpela provins bilong Saut Afrika, sampela man i wok leba long stretim rot em tren i save ran long en. Wanpela taim bos bilong ol, em man bilong Saut Afrika, nem bilong em Christiaan Venter, em i lukim wanpela hap pepa i pas aninit long hap ain bilong rot bilong tren. Em wanpela liklik nius Sosaiti Was Taua i bin wokim.

Em i tokim ol wokboi long lusim wok na malolo liklik, na em i kaunim gut ol tok bilong dispela nius. Em i amamas tru na em i ran i go tokim tambu pikinini bilong em, em Abraham Celliers, olsem: “Abraham, nau mi kisim save pinis long tok i tru!”

Liklik taim bihain tupela i raitim pas i go long lain bilong wokim dispela nius, na brens-ofis bilong Sosaiti Was Taua long Saut Afrika i salim sampela buk long tupela i kamapim ol tok bilong Baibel. Tupela i wok long lainim tok bilong ol dispela buk long belo na long apinun i go inap long biknait. I no longtaim na tupela i kirap tokim ol wantok na ol narapela man long ol tok i tru ol i wok long kisim save long en.

Bihain Christiaan na Abraham i kisim baptais na kamap Witnes Bilong Jehova. Ol i givim bel long mekim wok bilong God na ol i stap gut long em, olsem na ol inap helpim planti man long hap bilong Saut Afrika long kisim save long tok i tru. Long lain bilong tupela, winim 100 ol i mekim wok bilong Jehova long nau! Wanpela i mekim wok long namba wan ofis bilong ol Witnes Bilong Jehova long Bruklin, Nu Yok, na wanpela i wok long ofis bilong Sosaiti Was Taua long Saut Afrika.

Dispela samting i bin kamap inap olsem 70 yia i go pinis, tasol ol liklik nius i wok yet long helpim ol man long kisim save long tok bilong Kingdom.